Folkemengde og befolkningsendring, 2. kvartal 2015

Folketilveksten på 12 400 er 900 lågare enn i 2. kvartal 2014, og den lågaste veksten i andre kvartal sidan 2006. Den noko minkande folketilveksten heng saman med høgare utvandring. Talet på innflyttingar frå utlandet auka med nær 300 samanlikna med same kvartal i fjor, medan talet på utvandringar auka med om lag 1 400. I høve til 1. halvår i fjor, minka nettoinnvandringa med om lag 3 000.

Om lag 30 prosent av dei registrerte utvandringane har si årsak i ein pågåande opprydding i det sentrale folkeregisteret som utregistrerar personar som har flytta frå landet utan å melde frå til folkeregisteret. Ein må tilbake til 2. kvartal 2009 for å finne lågare nettoinnvandring i 2. kvartal.

Lågare nettoinnvandring frå Polen

Nettoinnvandringa av statsborgarar frå Øst-Europa, som hovudsakeleg har innvandra på grunn av arbeid, minkar, medan nettoinnvandringa frå land med konfliktar aukar. Det var framleis flest polakkar blant dei som innvandra til Noreg i 2. kvartal, men fordi mange polakkar vart registrerte som utvandra i same periode, var det større nettoinnvandring av statsborgarar frå Eritrea.

På lista over land med høg nettoinnvandring fylgde deretter Syria, Somalia og Afghanistan. Svært få statsborgarar frå desse landa utvandra.

Folketalet aukar framleis mest i Akershus

Det blei født nær 15 800 i 2. kvartal, og 9 700 døydde. Det er nær 200 færre døde og nokre få fleire fødde samanlikna med i fjor. Det var vekst i folketalet i alle fylka i 2. kvartal, bortsett frå i Oppland. Fylka rundt Oslofjorden hadde den høgaste folkeveksten sett i høve til folketalet. Som i same kvartal i fjor, vaks Akershus mest med 3 200 personar. Deretter fylgde Vestfold og Østfold.

I høve til folketalet hadde Oslo, Rogaland og Hordaland det største fødselsoverskotet. Berre Hedmark hadde fødselsunderskot i 2. kvartal.

Fleire flytta frå enn til Oslo

Oslo hadde eit innanlandsk flytteunderskot som var større enn flytteoverskotet frå utlandet. Flytteunderskot hadde også Oppland, Sør-Trøndelag, Troms og Finnmark, medan dei andre fylka, og Akershus særskild, hadde flytteoverskot.

Alle fylka hadde flytteoverskot frå utlandet. Størst flyttevinst frå utlandet sett i høve til folketalet hadde Finnmark, Oslo og Troms.

Lågaste folkevekst sidan 2007

Ser ein på første halvår samla, finn ein at folkeveksten ikkje har vore lågare sidan 2007 og nettoinnflyttinga ikkje har vore lågare sidan 2006. Om lag 31 000 flytta inn til Noreg frå utlandet i 1. halvår, medan om lag helvta så mange reiste frå landet.

Nær 30 000 born vart fødde og om lag 21 000 personar døydde. Det gjev eit fødselsoverskot på 8 700. Fødselsoverskotet og nettoinnvandringa til saman utgjer ein folkevekst på nær 24 000 eller 0,46 prosent i 1. halvår.