Liten auke i industriproduksjonen i 2. kvartal

Indeksnivået for industriproduksjonen var på 114,3 (2005=100) i 2. kvartal 2017, mot 113,5 i 1. kvartal. Glatta, sesongjusterte tal viser eit vendepunkt for industriproduksjonen i september 2016, og at det sidan då har vore ein viss auke i aktiviteten.

Tremånadersendring: oppgang i bygging av skip og oljeplattformer

Sesongjusterte tal viser ein auke i industriproduksjonen på 0,7 prosent fra 1. til 2. kvartal 2017. Bygging av skip og oljeplattformer bidrog mest til den samla oppgangen, med ein auke på 5,4 prosent. Oppgangen må sjåast i samanheng med særskilt stor aktivitet i april hos nokre toneangivande produsentar. Maskinreparasjon og -installasjon opplevde òg ein auke i denne perioden: opp 3,6 prosent.

Petroleumsretta leverandørindustri har samla sett hatt ein vekst på 2,2 prosent i dette kvartalet samanlikna med kvartalet før. For fleire detaljar om korleis petroleumsretta leverandørindustri påverkar industrien samla, sjå analysen Norsk Industri 2016 – et krevende år for industrien.

På den motsette sida bidrog oljeraffinering, kjemisk og farmasøytisk industri saman med næringsmiddelindustrien til å dempe oppgangen i den samla industriproduksjonen i perioden.

Månadsendring: Liten nedgang i industrien frå mai til juni 2017

Sesongjusterte tal viser at industriproduksjonen hadde ein liten nedgang på 0,6 prosent frå mai til juni 2017. Bygging av skip og oljeplattformer bidrog saman med ikkje-jernhaldige metall mest til denne nedgangen. Samstundes hadde mellom anna nærings-, drikkevare- og tobakksindustrien saman med kjemiske råvarer ein viss oppgang og bidrog til å dempe den samla nedgangen.

Tolvmånadsendring: flat utvikling i Noreg mot ein tydeleg auke i eurosona i mai 2017

Kalenderjusterte tal viser at norsk industriproduksjon var uendra frå mai 2016 til mai 2017. Maskinindustrien fall mest, medan oljeraffinering, kjemisk og farmasøytisk industri sto for det største positive bidraget i denne perioden. Estimerte tal frå Eurostat, statistikkontoret i EU, viser at industriproduksjonen i land i eurosona hadde ein auke på 4,3 prosent i den same perioden.

Tremånadersendring: den samla produksjonsindeksen var uendra

Produksjonsindeksen for olje- og gassutvinning, industri, bergverksdrift og kraftforsyning samla (PII) var uendra i 2. kvartal 2017 samanlikna med 1. kvartal. Utvinning av råolje hadde ein oppgang på 2,2 prosent, medan utvinning av naturgass gjekk ned med 0,4 prosent. For fleire detaljar om olje- og gassproduksjonen i juni 2017 sjå pressemelding frå Oljedirektoratet.

Innanfor utvinningstenester var det ein auke i produksjonen på 2,3 prosent i 2. kvartal 2017 samanlikna med det føregåande kvartalet. Verksemdene innanfor denne næringa har i lengre tid vore ramma av lågare investeringsaktivitet i olje- og gassektoren, men det er no nokre teikn til betring.

Bergverksdrift hadde på si side ein tydeleg nedgang på 5,7 prosent i den same perioden, medan produksjon innanfor norsk kraftforsyning auka med 2,1 prosent.