Arbeidstakarar etter bustad og utdanning, 4. kvartal 1997:

Fleire arbeidstakarar i alle fylka med unntak av Finnmark

---

Talet på arbeidstakarar auka med 2,6 prosent frå 4. kvartal 1996 til 4. kvartal 1997. Auken svarer til 47 800 arbeidstakarar. Størst auke var det i Østfold med 4,2 prosent, medan Finnmark hadde ein nedgang på 1,5 prosent. Alle andre fylke hadde auke i talet på arbeidstakarar.

---

Størst prosentvis auke i mannlege og kvinnelege arbeidstakarar fant vi i Østfold, med 4,6 og 3,8 prosent. For heile landet var auken 3,1 prosent for menn og 2,1 prosent for kvinner. I alle fylka med unntak av Finnmark, er det blant mannlege arbeidstakarar vi finn den største prosentvise auken.

Finnmark var det einaste fylket med nedgang i talet på arbeidstakarar sist år. Nedgangen var størst blant dei kvinnelege arbeidstakarane. Også i Troms var det ein nedgang i kvinnelege arbeidstakarar. Sogn og Fjordane og Troms var dei fylka med lågast auke i talet på arbeidstakarar, med 0,5 og 0,9 prosent.

Fleire arbeidstakarar under 67 år
For landet under eitt har det vore ein auke i talet på arbeidstakarar i alle aldersgrupper med unntak av dei i alderen 67-74 år. Nordland og Finnmark hadde også nedgang i aldersgruppa 25-39 år, medan Finnmark var det einaste fylket med nedgang i alle aldersgruppene over 40 år. Samtlege fylke hadde ein auke i talet på arbeidstakarar i aldersgruppa 16-19 år, og med unntak av Sogn og Fjordane og Finnmark, hadde alle fylka også ein auke i aldersgruppa 20-24 år.

Vekst frå 1990 til 1997
Frå 1990 til 1997 auka talet på arbeidstakarar med 10,9 prosent. Aust-Agder har hatt den største auken med 18,9 prosent. Deretter følgjer Rogaland og Møre og Romsdal med 17,0 og 13,6 prosent auke. Lågast vekst finn vi i Hedmark med 3,9 prosent. Tala er justerte for at 12 000 sjøfolk kom med i datagrunnlaget frå og med 1992.

Frå 1990 til 1997 har det vore ein auke i talet på kvinnelege arbeidstakarar som arbeider heiltid, det vil seie meir enn 30 timar i veka, i samtlege fylke. Oslo er det fylket som har høgaste delen kvinner som arbeider heiltid med 75,3 prosent, medan Vest-Agder er fylket med lågaste delen med 43,5 prosent. Nord-Trøndelag og Vestfold har dei sju siste åra hatt den største auken i delen kvinner som arbeider heiltid, medan Oslo og Oppland har hatt lågast auke.

For menn har det i same periode vore ein nedgang i delen som arbeider heiltid. Finnmark og Nordland har hatt den største nedgangen i delen mannlege arbeidstakarar som arbeider heiltid, medan Sogn og Fjordane og Nord-Trøndelag har hatt minst nedgang. Den høgaste delen menn som arbeider heiltid finn vi i Møre og Romsdal (90,5 prosent), medan Nord-Trøndelag har lågast del (87,1 prosent).

Fleire med høgare utdanning
Dei siste sju åra har det vore ein sterk auke i gruppa arbeidstakarar med utdanning på universitet- og høgskulenivå. Delen har auka frå 21,7 prosent i 1990 til 27 prosent i 1997. Auken har vore størst i Oslo og Troms og delen arbeidstakarar med utdanning på universitet og høgskule var høgast i Oslo, med 39,7 prosent. Telemark hadde den lågaste auken i delen arbeidstakarar med universitet- og høgskuleutdanning frå 1990 til 1997, medan delen i 1997 er lågast i Oppland, med 21,3 prosent.

Færre med berre grunnskule
I 1990 hadde 20,7 prosent av arbeidstakarane grunnskule som høgaste utdanning jamført med 13 prosent i 1997. Hedmark og Oppland har hatt størst reduksjon i delen arbeidstakarar med grunnskuleutdanning, med 9,7 og 9,8 prosent-poeng. Likevel er det framleis desse fylka som i 1997 har den høgaste delen arbeidstakarar med berre grunnskule, med 17,9 og 16,5 prosent.

Oslo er fylket med minst reduksjon i delen frå 1990 til 1997. Likevel er Oslo det fylket som i 1997 har lågast del arbeidstakarar med grunnskule som høgaste utdanning, med 9,5 prosent.

Tabeller