Færre vigslar enn på 25 år

I 2019 vart det inngått 19 855 giftarmål, mindre enn noko anna år etter 1993. Det er særleg etter 2017 vi ser bratt nedgang i talet på vigslar, med over 2 250 færre giftarmål berre dei to siste åra.

Kommunal vigselrett vinn fram

Kommunane tok 1. januar 2018 over retten til borgarleg vigsel. Trass i at det samla giftarmålstalet har stupt sidan den gong, var det over 1 000 fleire borgarlege vigslar i 2019 enn i 2017. Tett oppunder 8 900 par valte å smi seg i Hymens lenkjer på det lokale rådhuset, og det er 2 000 fleire enn talet på vigslar i Den norske kyrkja.

Giftarmål i utlandet var lenge ein aukande trend, men frå 2013 har dette snudd og er no halvert sidan den gong. Ein er med dette tilbake på same nivå som for 20 år sidan.

To av tre likekjønna vigslar er mellom kvinner

Det samla talet for likekjønna par som giftar seg har vore heilt stabilt dei tre siste åra. Av 331 giftarmål mellom personar av same kjønn i 2019, var heile 222 kvinner. For mennene har dette talet halde seg høveleg jamt med litt over 100 personar heilt sidan 2001, med eit «toppår» på 139 i 2018.

Vi ventar med å gifte oss

Tidlegare års auke i gjennomsnittsalder ved førstegongs giftarmål held fram, og var 35,5 år for menn og 33,1 år for kvinner i 2019. Dette er om lag 10 år høgare enn for 40 år sidan og samstundes den sterkaste eittårige auken vi har sett i moderne tid.

Giftarmålsraten for førstegongsvigde gjev det same biletet og gjekk ned for alle grupperingar under 40 år for begge kjønn samanlikna med dei seinaste åra. Det er verdt å merke seg at ratane for kvinner mellom 25 og 34 år fell sterkt frå 2018, men at dei samstundes har halde seg toleleg stabile for kvinner 40 år og eldre dei siste 5-6 åra.

Raten er eit mål på kor vanleg giftarmål er i ulike aldersgrupper, målt som talet på førstegongsgifte per 1 000 i befolkninga. Han er på sitt høgste i 30-34-årsgruppa, med 33,8 for menn og 38,0 for kvinner i 2018.

Små endringar for skilsmisser og separasjonar

Det var 64 fleire skilsmisser i 2019 enn året før, samstundes som det var 208 færre separasjonar. Dette synest å vera innanfor det ein reknar som vanlege statististiske variasjonar. Gøymt inne i dei stabile samletala finn vi at det aldri har vore nær like mange likekjønna skilsmisser som i 2019. Samanlikna med 2018 er 111 likekjønna skilsmisser i 2019 ein auke på 31. Det er naturleg at skilsmissetala stig som fylgje av at det samla talet på likekjønna partnarskap/ekteskap framleis er i vekst. Om lag sju av ti skilsmisser er mellom kvinner, og dette er på same nivå som tidlegare.