Vi nærmar oss 5,33 millionar

Sett i høve til folketalet var veksten likevel svakare dei fleste åra mellom 1975 og 1996 enn han var i 2018. I perioden 2006-2016 var folketalsveksten spesielt sterk, så nivået i 2018 var slik sett meir normalt.

Fleire fylke med nedgang i folketalet

Akershus og Oslo hadde den største folketalsveksten i 2018, syner statistikken folkemengde. Desse to fylka stod for vel halvparten av den samla veksten. 

Folketalet gjekk ned i fire fylke i 2018: Sogn og Fjordane, Oppland, Finnmark og Telemark. Ein må tilbake til 2005 for å finne så mange fylke med befolkningsnedgang. I mellomtida har det vanlegaste vore at ingen fylke har gått ned i folketal.

Talet på kommunar med folketalsnedgang i 2018 var 227. Det er ein klar auke frå året før, og ikkje minst frå åra før der igjen. Men går ein tilbake til åra 2004-2006 blir tala om lag dei same som i 2018.

Flest polakkar

I 2018 blei det nærare 17 000 fleire utanlandske statsborgarar i landet, og denne veksten utgjer dermed akkurat litt over halvparten av den samla folketalsveksten. Polakkane står i ei særstilling med over 105 000 personar, eller 18 prosent av dei meir enn 584 000 utanlandske statsborgarane som bur i Noreg. Dei er dermed godt over dobbelt så mange som dei neste på lista: litauarar og svenskar utgjer kvar rundt 45 000 busette.

Ei stadig eldre befolkning

1. januar 2019 var befolkninga i gjennomsnitt 40,28 år gamal. I alle år vi har tilgjengeleg årleg aldersfordelingsstatistikk, har gjennomsnittsalderen auka litt for kvart år. Dei siste åra har den årlege auken gått raskare, og i 2018 var auken på 0,23 år. Ei så rask årleg aldring som dette har vi ikkje sett før.