Ekteskap og skilsmisser, 2001

Dei 10 300 skilsmåla i 2001 svarar til 11,8 skilde per 1 000 gifte og separerte kvinner. Dei to tidlegare åra var skilsmisseratane 11,5 og 10,4.

Høgast skilsmålsrate i Oslo

Flest skilsmål i høve til talet på gifte og separerte kvinner var det i Oslo, der gjennomsnitt skilsmålrate var 17,0 for åra 1997-2001. Deretter fylgjer fylka Vestfold med 12,7, og Finnmark med 12,3. Lågast rate hadde Sogn og Fjordane med 6,7, Møre og Romsdal med 8,1 og Nord-Trøndelag med 8,6. Det er mannen sitt bustadsfylke ved skilsmålet som ligg til grunn for denne utrekninga, og treng ikkje vera det same fylket som mannen budde i ved samlivsbrotet.

Fleire skilde i dei fleste aldersgruppene

Talet på skilde per 1 000 gifte og separerte auka for menn og kvinner i så godt som alle aldersgrupper.

For kvinner auka skilsmålsraten aller mest i aldersgruppa 20-24 år, og for menn auka ratene mest i aldersgruppa 30-34 år.

Om lag 50 prosent av ekteskapa som vart oppløyste i 2001 ved skilsmål, hadde vore gifte i 12 år eller mindre.

10 800 born under 18 år opplevde skilsmål i 2001. Mange born opplever òg samlivsbrot fordi det er brot i sambuarskapet til foreldra. Ei undersøking synte at det i 1999 dreide seg om 7 500 born. Borna frå dei brotne sambuarskapa er yngre i høve til borna som opplevde skilsmål. Det eksisterar inga årleg statistikk over brotne sambuarskap.

Risikoen for skilsmål aukar

Ut frå skilsmålmønsteret i 2001 er det rekna ut at 47,8 prosent ekteskap kan ende i skilsmål. Utrekninga i fjor ga 46,8 prosent. Prosenten har auka frå 9,5 i 1960 til 47,4 i 1994. For åra 1995 til 1999 var prosenten lågare, medan den på nytt har auka dei to siste åra.

I 84 prosent av ekteskapa som vart oppløyste ved skilsmål, var båe norske statsborgarar, og i 13 prosent av ekteskapa hadde den eine norsk statsborgarskap medan den andre hadde statsborgarskap frå eit anna land.

Tabeller:

• Tabell 1 Oppløyste ekteskap. Separasjonar. 1961-2001
• Tabell 2 Skilsmål og separasjonar, etter fylke. 1981-2001
• Tabell 3 Skilsmålsrater for menn og kvinner i ulike aldersgrupper. 1959-2001
• Tabell 4 Skilsmål, etter talet på år ekteskapet har vara. 1971-2001
• Tabell 5 Skilsmål, etter talet på felles barn. 1971-2001
• Tabell 6 Talet på barn involvert av skilsmål. 1971-2001
• Tabell 7 Skilsmål, etter talet på barn og talet på år ekteskapet har vara. 2001
• Tabell 8 Skilsmål, etter alderen til hustru og mann ved skilsmålet. 2001
• Tabell 9 Berekna prosent ekteskap som vil bli oppløyst, såframt skilsmålsratar som i det einskilde året. 1960-2001
• Tabell 10 Skilsmål 2001. Kvinnen sitt og mannen sitt statsborgarskap
• Tabell 11 Skilsmålr, etter hustrua sitt og mannen sitt statsborgarskap. 2001
• Tabell 12 Barn under 18 år som har opplevd skilsmål. Fylke. 2001