Berekna folkemengd ved årsskiftet, 1. januar 2013

Ein folkevekst på 67 600 vil vere om lag dobbelt så høg som han var i åra fram til og med 2005. I dei sju åra frå og med 2006 har folketalet vokse med i alt 413 000. Ikkje sidan 1920 har veksten i prosent vore på same nivået. 72 prosent av folkeveksten vil kome på grunn av innflyttingsoverskotet frå utlandet, medan 28 prosent kjem av fødselsoverskotet. Til samanlikning var det på midten av 1990-talet fødselsoverskotet som stod for den største parten av folkeveksten med 70 prosent. Ei nettoinnvandring frå utlandet på 48 600 vil vere den høgaste nokosinne, 1 600 høgare enn i det førre toppåret 2011. Eit fødselsoverskot på 19 000 vil vere på same nivå som i åra frå og med 2008, men før det må ein attende til åra før 1975 for å finne høgare tal.

Stadig vekst i sentrale strok

Som vanleg held folkeveksten i dei store byane og sentrale områda fram, men medan 37 prosent av folkeveksten i fjor fann stad i Oslo og Akershus, vil delen i år berre vere 30 prosent. Medan veksten vert mindre i år enn i fjor i Oslo og Oppland, vert han større i Rogaland, Hordaland, Sør-Trøndelag, Troms og Finnmark. Oslo veks med 10 100 personar (4 000 færre enn i 2011), Bergen med 4 100 (700 meir enn førre året) og Trondheim med 3 300 (400 meir enn i fjor).