Folkemengde og befolkningsendring, 2. kvartal 2010

Etter ein nedgang i folketilveksten i 2. kvartal 2009 var veksten på veg opp igjen i 2. kvartal 2010. Nettoinnvandringa låg i perioden april-juni i år vel 1 000 under nivået frå 2. kvartal 2008, som var eit år med rekordhøg innvandring. Talet på fødde i 2. kvartal i år fall litt sett i høve til same kvartalet i fjor, medan det døydde om lag like mange som i same perioden året før.

Sett i høve til folketalet var folkeveksten høgast i Akershus og Rogaland som hadde ein auke på respektive 2 400 og 1 900 personar. Den relative veksten var derimot lågast i Finnmark med 26 personar.

Litt færre fødde

Etter ein auke i 2. kvartalstala for fødslar sidan 2002 gjekk talet på fødslar tilbake frå 16 200 i 2009 til 15 700 i 2. kvartal 2010. Talet på døde låg på same nivået som i perioden april-juni i fjor, med 9 800 personar.

Fødselsoverskott i alle fylka unnateke Hedmark og Oppland

Det blei født fleire enn det døydde i alle fylka unnateke Hedmark og Oppland i 2. kvartal 2010. Av dei 50 kvartala som har gått sidan 1997, har Hedmark hatt fødselsunderskott i 43 kvartal og Oppland i 38. Oslo hadde høgast fødselsoverskott med 1 600 fleire fødde enn døde. Også sett i høve til folketalet var fødselsoverskottet høgast i Oslo med 2,8 per 1000 innbyggjarar. Etter Oslo fylgde Rogaland og Hordaland med høgast fødselsoverskott sett i høve til folketalet. Oslo og Akershus samla hadde 41 prosent av fødselsoverskottet for landet, noko som er om lag som gjennomsnittet for perioden 2000-2010.

Mange innvandra og mange utvandra

I 2. kvartal 2010 vart det registrert 15 300 innvandringar, det vil seie 2 100 fleire enn same perioden året før. Samstundes var det ei rekordhøg utvandring på 6 400. Dette ga den nest største nettoinnvandringa registrert i noko 2. kvartal.

Flest polakkar innvandra

Sidan i fjor har innvandringa av polske statsborgarar i 2. kvartal auka frå 2 030 til 2 430, mens utvandringa har gått ned frå 1 010 til 810. Nettoinnvandringa av polske statsborgarar har dermed auka frå 1 020 i 2. kvartal 2009 til 1 620 i same tidsrommet i 2010. Det er likevel mykje mindre enn nettoinnvandringa på drygt 7 000 polakkar i 2. kvartal 2008. Nettoinnvandringa av statsborgarar frå Litauen auka frå 510 i 2. kvartal 2009 til 1 370 i tilsvarande kvartal 2010, som er høgare enn nettoinnvandringa i 2. kvartal i rekordåret 2008. Registrert nettoinnvandring av svenskar har gått tilbake sidan 2008 og var 320 i 2. kvartal 2010.

Alle fylka opplevde flytteoverskott frå utlandet. Størst var det i Oslo og Hordaland med høvesvis 1 500 og 1 000 personar. I høve til folketalet var nettoinnvandringa høgast i Oslo, fylgd av Sogn og Fjordane.

Første halvår 2010 flytta 34 400 personar frå utlandet til Noreg, som er 4 700 fleire enn i same perioden i 2009. 14 700 personar flytta i dette tidsrommet frå Noreg, 1 500 fleire enn i same perioden i fjor. Innflyttingsoverskottet for heile landet blei 19 700 i første halvår, 3 200 høgare enn i første halvparten av fjoråret.

Størst innanlands flyttevinst for Akershus og Østfold

I 2. kvartal 2010 hadde ti fylke positiv flyttebalanse i høve til resten av landet. Høgast var dette overskottet i Akershus med 800 og Østfold med 500. Ni fylke hadde negativ innanlandsk flyttebalanse. Dette flyttetapet var høgast i Oslo med 1 100 og Sør-Trøndelag med 300.

Folketalet voks i over 300 kommunar

Folketalet voks i 303 kommunar i 2. kvartal, medan det gjekk ned i 113 kommunar. I 2009 var det 268 kommunar med vekst og 146 med tap. Oslo hadde størst vekst i folketalet i 2. kvartal 2010, fylgd av Bergen og Stavanger. Sett i høve til folketalet var veksten størst i dei små kommunane Bygland i Setesdal, Finnøy ved Stavanger og Herøy i Nordland. Det relative tapet var derimot størst i dei små kommunane Træna i Nordland, Kvalsund i Finnmark og Berg i Troms. Lillehammer hadde størst tap i absolutte tal.