Auke i industriproduksjonen

Indeksnivået for industriproduksjonen var  på 117,1 (2005=100)  i perioden september-november 2018 mot 116 i føregåande periode. Den langsiktige trenden viser nå ei oppgang sidan tidlig i 2018 (sjå figur 1).

Tremånadersendring: høg aktivitet i bygging av skip og oljeplattformer

Sesongjusterte tal viser at industriproduksjonen hadde ein auke på 0,9 prosent i perioden september–november 2018, samanlikna med førre tremånadersperiode. Veksten kan i sær knytast til ein auke på heile 9 prosent for bygging av skip og oljeplattformer, der det var særleg høg aktivitet innanfor skipsbygging. Den petroleumsretta leverandørindustrien hadde samla sett ein produksjonsauke på 2,8 prosent. Vidare bidrog også næringsgruppa oljeraffinering, kjemisk og farmasøytisk industri til den samla oppgangen, med ein vekst på 1,9 prosent.

På den motsette sida bidrog næringsmiddelindustrien til å dempe den samla oppgangen. Her var det ein nedgang i produksjonen på 2,5 prosent, noko som særleg kan knytast til lågare aktivitet innan foredling og konservering av fisk. Mellom anna var det lågare mengde foredla makrellprodukt i perioden grunna reduserte kvoter.  

Månadsendring: produksjonen uendra

Sesongjusterte tal viser at den samla industriproduksjonen var uendra frå oktober til november 2018. Næringane bygging av skip og oljeplattformer samt maskinreparasjon og -installasjon bidrog til å trekke samla produksjon i positiv retning. På den andre sida opplevde næringsgruppa gummi, plast og mineralsk industri, saman med metallindustrien, ein nedgang som bidrog til å dempe den samla aktiviteten.   

Marginal oppgang i eurosona, klår vekst i Noreg i oktober

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein marginal auke på 0,2 prosent frå september til oktober 2018. I den same perioden hadde produksjonen i Noreg ein oppgang på 1,5 prosent.

Både Sverige og Danmark hadde òg ein oppgang i industriproduksjonen i den same perioden, på høvesvis 3,2 og 1 prosent.

  

Tremånadersendring: nedgang i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein nedgang på 0,7 prosent i perioden september-november 2018 samanlikna med førre tremånadersperiode, viser sesongjusterte tal. Utvinning av råolje hadde ein nedgang på 5 prosent, medan utvinning av naturgass fall med heile 11,1 prosent i perioden, samanlikna med førre tremånadersperiode. For fleire detaljar om olje- og gassproduksjonen i november 2018 sjå pressemelding frå Oljedirektoratet.

Utvinningstenester på si side hadde ein auke på 2,8 prosent i perioden september-november, medan  bergverksdrift opplevde eit fall på 1,7 prosent.

Kraftforsyning hadde ein vekst på så mykje som 12,7 prosent, og bidrog soleis til å dempe den samla nedgangen i produksjonsindeksen. Veksten i næringa heng særleg saman med svært låg produksjon i førre tremånadersperiode, som var prega av svært lite nedbør.