Flat utvikling i industriproduksjonen

Indeksnivået for industriproduksjonen var på 114,1 (2005=100) i perioden mars-mai 2017, mot 113,7 i tremånadersperioden før. Glatta, sesongjusterte tal viser eit vendepunkt for industriproduksjonen i september 2016, og at det sidan då har vore ein viss auke i aktiviteten.

Tremånadersendring: oppgang i bygging av skip og oljeplattformer

Sesongjusterte tal viser ein svak auke i industriproduksjonen på 0,4 prosent i perioden mars-mai 2017 samanlikna med tremånadersperioden før. Bygging av skip og oljeplattformer bidrog mest til den totale veksten med ein auke på 2,8 prosent. Auken må sjåast i samanheng med særskilt stor aktivitet i april hos nokre toneangivande produsentar. I tillegg var det òg moderat vekst i maskinreparasjon og -installasjon.

Samstundes bidrog andre oljerelaterte næringar, som maskinindustri og dataindustri og elektrisk utstyrsindustri, til å dempe oppgangen i den samla industriproduksjonen. Samla fall petroleumsretta leverandørindustri med 0,9 prosent. For fleire detaljar om korleis petroleumsretta leverandørindustri påverkar industrien samla sjå analysen Norsk Industri 2016 – et krevende år for industrien.

Månadsendring: Liten nedgang i industrien frå april til mai 2017

Sesongjusterte tal viser at industriproduksjonen hadde ein liten nedgang på 0,3 prosent frå april til mai 2017. Bygging av skip og oljeplattformer bidrog saman med næringsmiddelindustrien mest til den samla nedgangen. Når det gjeld plattform- og skipsbygging, heng nedgangen saman med høg produksjon i april, trass i påsken. Lågare produksjon innanfor foredling og konservering av fisk forklarar fallet i næringsmiddelproduksjonen. Samstundes viste næringsgruppa oljeraffinering, kjemisk og farmasøytisk industri ein klår oppgang grunna høg produksjon av farmasøytiske produkt.

Tolvmånadsendring: svak vekst i Noreg mot ein klår auke i eurosona i april 2017

Kalenderjusterte tal viser at norsk industriproduksjon auka svakt med 0,4 prosent frå april 2016 til april 2017. Næringsgruppa oljeraffinering, kjemisk og farmasøytisk industri bidrog mest til oppgangen med ein vekst på 10,1 prosent. Estimerte tal frå Eurostat, statistikkontoret i EU, viser at industriproduksjonen i land i eurosona hadde ein auke på 1,7 prosent i den same perioden.

Tremånadersendring: vekst i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) auka med 0,9 prosent i perioden mars-mai 2017 samanlikna med tremånadersperioden før, viser sesongjusterte tal. Utvinning av råolje hadde ein oppgang på 1,5 prosent, medan utvinning av naturgass auka med 1,2 prosent. For fleire detaljar om olje- og gassproduksjonen i mai 2017 sjå pressemelding frå Oljedirektoratet.

Innanfor utvinningstenester var det ein nedgang i produksjonen på 1,0 prosent i perioden mars-mai 2017 samanlikna med den føregåande tremånadersperioden. Verksemdene innanfor denne næringa vert mellom anna ramma av lågare investeringsaktivitet i olje- og gassektoren. Trass i vedvarande nedgang i næringa er det teikn til at fallet byrjar å flate ut.

Bergverksdrift hadde på si side ein tydeleg nedgang på 6,9 prosent i den same perioden, medan produksjon innanfor norsk kraftforsyning auka med 0,4 prosent.