Kraftig fall i industriproduksjonen

Indeksnivået for industriproduksjonen var på 118,1 (2005=100) i 1. kvartal 2020 mot 119,3 i føregåande kvartal. Den langsiktige trenden viser at industriproduksjonen flata ut gjennom andre halvdel av 2019. Grunna behandlinga av mars som ein ekstremverdi er ikkje trendutviklinga etter dette representativ for faktisk utvikling. Trenden har difor blitt tatt ut frå figur 1 for dei seinaste månadene. For meir informasjon, sjå informasjonsboksen om koronaviruset i slutten av artikkelen.

Månadsendring: kraftig fall i petroleumsretta leverandørindustri, auke i næringsmidlar

Sesongjusterte tal viser at industriproduksjonen fall med heile 3 prosent frå februar til mars 2020. Det er særleg produsentar innanfor petroleumsretta leverandørindustri som opplever nedgang. Dette er arbeidsintensive verksemder som har mykje leveransar til olje- og gassnæringa. Strenge smittevernsreglar og karantene for tilsette meldas som viktige årsakar bak den låge aktiviteten. Dette rammer særleg bruken av utanlandsk arbeidskraft. Nedgangen var størst innanfor bygging av skip og oljeplattformer som gjekk ned med så mykje som 22 prosent.

På den motsette sida bidrog næringsmiddelindustrien til å dempe det samla produksjonsfallet i mars med ein klår oppgang på 4,1 prosent. Veksten heng saman med høg etterspurnad frå den norske dagligvarebransjen knyta til koronasituasjonen. Auken i etterspurnad kan sjåast i samanheng med lågare grensehandel og hamstring av dagligvarer i andre halvdel av mars. For meir informasjon, sjå òg artikkel om auke i daglegvarehandelen i mars.

Tremånadsendring: klår nedgang frå 4. kvartal 2019 til 1. kvartal 2020

Sesongjusterte tal viser at industriproduksjonen gjekk ned med 1 prosent frå 4. kvartal 2019 til 1. kvartal 2020. Det var særleg den låge produksjonen i mars som trekte ned aktiviteten i 1. kvartal samla sett. Det var bygging av skip og oljeplattformer saman med maskinreparasjon og -installasjon som bidrog mest til den samla nedgangen på kvartalsbasis.

Månadsendring: uendra industriproduksjon i Eurosona i februar

Estimerte tal frå Eurostat, statistikkontoret i EU, viser at den samla industriproduksjonen i land i eurosona var uendra frå januar til februar 2020. Denne utflatinga blir sannsynlegvis midlertidig ettersom effektane av koronaviruset ventes å trekke ned produksjonstala i eurosona for alvor frå og med mars.

I den same perioden hadde industriproduksjonen i Noreg ein liten nedgang på 0,5 prosent. Sverige hadde  tilnærma uendra utvikling i industriproduksjonen, medan Danmark på si side hadde ein klår oppgang på 2,1 prosent.

For fleire nøkkeltal om europeisk næringsliv, sjå Eurostats informasjonsside om europeisk økonomisk statistikk.

Tremånadersendring: olje- og gassutvinning bidrog til auke i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein oppgang på 1,5 prosent i 1. kvartal 2020 samanlikna med førre kvartal, viser sesongjusterte tal. Utvinning av råolje hadde ein klår oppgang på 6,9 prosent, medan utvinning av naturgass hadde ein auke på 3,9 prosent. Olje- og gassproduksjonen blei ikkje nemneverdig påverka av koronautbrotet i fyrste kvartal. Veksten i norsk petroleumsproduksjonen i denne perioden kan mellom anna knytast til produksjonsstart ved eit nytt oljefelt på hausten 2019. For fleire detaljar om olje- og gassproduksjonen i fyrste kvartal 2020, sjå pressemelding frå Oljedirektoratet.

Utvinningstenester hadde ein auke på 0,7 prosent i 1. kvartal 2020 samanlikna med førre kvartal. Bergverksdrift hadde ein nedgang på 4,7 prosent, medan det for norsk kraftforsyning var ein vekst på 4,1 prosent i denne perioden. Det var særleg høg kraftproduksjon i mars mellom anna grunna oppstart av nye vindkraftanlegg.