Liten nedgang i industriproduksjonen

Indeksnivået for industriproduksjonen var på 117,5 (2005=100) i 1. kvartal 2019 mot 118 i føregåande kvartal. Glatta sesongjusterte tal viser ein noko fallande trend for dei siste tre månadene (sjå figur 1).

Tremånadersendring: auke i petroleumsretta leverandørindustri, fall i annan industri

Sesongjusterte tal viser at industriproduksjonen var nær uendra frå 4. kvartal 2018 til 1.kvartal 2019 med eit lite fall på 0,4 prosent. Næringar som metallvareindustrien og bygging av skip og oljeplattformer hadde ein tydeleg oppgang i dette kvartalet med ein auke på høvesvis 3,4 og 7,7 prosent. Samla sett hadde den petroleumsretta leverandørindustrien ein klår produksjonsauke på 3,2 prosent.

På den motsette sida, ble den samla industriproduksjonen trekt ned av lågare produksjon i næringsgruppa oljeraffinering, kjemisk og farmasøytisk industri. Årsaka til nedgangen skuldast mellom anna driftsstansar blant fleire viktige produsentar. I tillegg bidrog også næringsmiddelindustrien negativt grunna låg produksjon innanfor foredling og konservering av fisk.

 

Månadsendring: nedgang i industriproduksjon frå februar til mars 2019

Sesongjusterte tal viser at den samla industriproduksjonen hadde eit fall frå februar til mars 2019 på 0,8 prosent. Det var særleg låg produksjon i næringsmiddelindustrien som bidrog til nedgang i den samla industriproduksjonen. I tillegg var det òg nedgang i metallindustrien og i næringsgruppa dataindustri og elektrisk utstyrsindustri.  

Små endringar både i eurosona og i Noreg i februar 2019

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein marignal oppgang på 0,3 prosent frå januar til februar 2019. I den same perioden var det eit lite fall i Noreg på 0,3 prosent.

Industriproduksjonen i Sverige hadde ein marginal auke i den same perioden, medan det i Danmark var ein klår nedgang på 1,2 prosent. 

Tremånadersendring: tydeleg fall i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde eit tydeleg fall på heile 4,9 prosent i 1. kvartal 2019 samanlikna med det føregåande kvartalet, viser sesongjusterte tal. Utvinning av råolje fall betydeleg med 5,6 prosent, medan utvinning av naturgass gjekk ned med 1,9 prosent. For fleire detaljar om olje- og gassproduksjonen i mars 2019 sjå pressemelding frå Oljedirektoratet.

Utvinningstenester på si side hadde ein tydelig auke på 5,4 prosent i 1. kvartal 2019 samanlikna med føregåande kvartal. Veksten heng mellom anna saman med høgare investeringsaktivitet i den norske olje- og gassnæringa.

Bergverksdrift hadde òg ei positiv utvikling i den same perioden, og auka med 3,2 prosent, medan produksjon i norsk kraftforsyning fall kraftig med heile 12 prosent. Nedgangen i kraftforsyning må sjåast i samanheng med ein relativt mild vinter.