Marginal auke i industriproduksjonen i juni

Indeksnivået for industriproduksjonen var på 111,5 (2005=100) i 2. kvartal 2020 mot 118,1 i føregåande kvartal. Figur 1 visar at dei sesongjusterte tala har hatt ei relativt stabil utvikling det siste året, før produksjonen fall kraftig frå og med mars 2020.

Grunna behandlinga av mars og følgjande månader som ekstremverdiar er ikkje trendutviklinga etter dette representativ for faktisk utvikling. Trenden har difor blitt tatt ut frå figur 1 for dei seinaste månadene. For meir informasjon, sjå informasjonsboksen om koronaviruset i slutten av artikkelen.

Månadsendring: bransjevise skilnader i industriproduksjonen i juni

Sesongjusterte tal viser at industriproduksjonen samla sett hadde ein liten auke på 0,4 prosent frå mai til juni. Denne auken kjem etter tre månader med tydeleg nedgang i produksjonsaktiviteten. Det var næringsgruppa oljeraffinering, kjemisk og farmasøytisk industri som bidrog mest til auken i juni, saman med næringsgruppa møbelindustri og anna industri. Dei to næringsgruppene hadde produksjonsauke på 4,5 og 19 posent høvesvis. 

På den motsette sida var det næringsmiddel- og drikkevareindustrien samt metallindustrien som sto for dei største bidraga i negativ retning i perioden. Nedgangen i fyrstnemnde kan mellom anna knytast til lågare produksjon innan tilverking og konservering av fisk. Nedgangen i metallindustrien kan knytast til dårlegare global marknadssituasjon grunna verknadane av tiltaka satt i verk for å hindre spreiinga av koronapandemien.

Tremånadsendring: historisk fall i industriproduksjonen

Sesongjusterte tal viser at industriproduksjonen gjekk ned med så mykje som 5,6 prosent i 2. kvartal 2020 samanlikna med førre kvartal. Det er ikkje målt større fall i eit kvartal for industriproduksjonen i denne tidsserien som går tilbake til 1990. Det bratte fallet må sjåast i samanheng med at alle tre månadene i denne perioden har vore sterkt prega av koronasituasjonen. Bygging av skip og oljeplattformer bidrog klart mest til nedgangen i denne perioden med eit fall på heile 26 prosent. 

På den andre sida, bidrog næringsmiddelindustrien til å dempe den samla nedgangen i industrien noko, med ein produksjonsauke i perioden. Veksten heng mellom anna saman med høg etterspurnad frå den norske daglegvarebransjen i kvartalet.

Månadsendring: solid auke i Eurosona i mai 2020

Estimerte tal frå Eurostat, statistikkontoret i EU, viser at den samla industriproduksjonen i land i eurosona auka med heile 13 prosent frå april til mai 2020. Den solide auken kjem etter to månader med kraftig produksjonsfall som en følgje av dei ulike tiltaka som vart sette i verk for å hindre spreiinga av koronaviruset. Etter at medlemslanda byrja å lette på tiltaka i mai gjekk industriproduksjonen opp, men var framleis på eit særs lavt nivå samanlikna med same månad i fjor.

I den same perioden hadde industriproduksjonen i Noreg ein nedgang på 3 prosent. Sverige hadde ein produksjonsauke på 1,1 prosent, medan Danmark hadde eit fall på 3 prosent.

For meir informasjon om utviklinga i europeisk industriproduksjon i mai, sjå denne artikkelen frå Eurostat.

Tremånadersendring: liten nedgang i samla produksjonsindeks

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein liten nedgang på 0,5 prosent i perioden 2. kvartal 2020 samanlikna med førre kvartal, viser sesongjusterte tal. Utvinning av råolje hadde ein oppgang på 6,8 prosent, medan utvinning av naturgass gjekk ned 4,7 prosent. For fleire detaljar om olje- og gassproduksjonen i dette kvartalet, sjå pressemelding frå Oljedirektoratet.

Utvinningstenester opplevde ein kraftig nedgang på heile 15 prosent i 2. kvartal 2020 samanlikna med førre kvartal. Strengje smittevernsreglar saman med den låge oljeprisen og reduserte leteinvesteringar på norsk sokkel forklarer nedgangen.

Bergverksdrift hadde ein nedgang på 0,9 prosent i same periode, medan det for norsk kraftforsyning var ein vekst på over 15 prosent. Den høge kraftproduksjonen skuldast mellom anna eit behov for å gjera plass til mykje vanntilsig i magasina før snøsmeltinga starta for fullt.