Moderat nedgang i industriproduksjonen i sommar

Indeksnivået for industriproduksjonen var på 113,7 (2005=100) i perioden juni-august 2017, mot 114 i tremånadersperioden før. Glatta sesongjusterte tal viser no ein fallande trend for dei siste tre månadene, slik det kjem fram i figur 1.

Tremånadersendring: leverandørnæringane trekkjer industriproduksjonen ned

Sesongjusterte tal viser ein liten nedgang i industriproduksjonen på 0,3 prosent i perioden juni-august 2017 samanlikna med tremånadersperioden før. Låg aktivitet innanfor petroleumsretta leverandørindustri, som samla sett fall med 3,3 prosent, er hovudårsaka til denne nedgangen. Aktiviteten var særleg låg i maskinindustrien og i bygging av skip og oljeplattformer. I skips- og plattformbygging heng nedgangen delvis saman med ferdigstilling av fleire prosjekt. For fleire detaljar om korleis petroleumsretta leverandørindustri påverkar industrien samla sjå analysen Norsk Industri 2016 – et krevende år for industrien.

Nedgangen i industrien samla blir derimot dempa av høg aktivitet innanfor næringsgruppa gummi, plast og mineralsk industri som voks med 4,3 prosent. Næringsgruppa produserer blant anna innsatsfaktorar til byggje- og anleggsnæringa, og oppgangen kan knytast til høg aktivitet i Noreg i denne næringa.

 

 

Månadsendring: kraftig nedgang i industrien frå juli til august 2017

Sesongjusterte tal viser at industriproduksjonen fall med heile 5,7 prosent frå juli til august 2017. Det var særleg næringsmiddelindustrien som bidrog mest til denne nedgangen, saman med bygging av skip og oljeplattformer. Nedgangen i næringsmiddelindustrien heng mellom anna saman med redusert produksjon innanfor foredling og konservering av fisk.

I tillegg til liten aktivitet i desse næringane kan noko av nedgangen i august 2017 knytast til meir ferieavvikling i august i år enn i dei føregåande åra (sjå eigen boks nedanfor).

Tolvmånadsendring: klår industrivekst i eurosona i juli, auke også i Noreg

Kalenderjusterte tal viser at norsk industriproduksjon hadde ein auke på 1,3 prosent frå juli 2016 til juli 2017. Næringsgruppa oljeraffinering, kjemisk og farmasøytisk industri bidrog mest til oppgangen med ein vekst på 14,8 prosent.

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein kraftig auke på heile 3,4 prosent i den same perioden.

Tremånadersendring: auke i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein auke på 1,0 prosent i perioden juni- august 2017 samanlikna med den førre tremånadersperioden. Veksten heng særskilt saman med ein tydeleg oppgang i utvinning av naturgass som auka med 9,8 prosent. Utvinning av råolje gjekk på si side ned med 3,8 prosent. For fleire detaljar om olje- og gassproduksjonen i august 2017 sjå pressemelding frå Oljedirektoratet.

Innanfor utvinningstenester var det ein klar auke i produksjonen på 3,5 prosent i perioden juni-august 2017 samanlikna med den føregåande perioden. Verksemdene innanfor denne næringa vert sterkt påverka av investeringsaktiviteten i norsk olje- og gassektor, og oppgangen kan knytast til nokre store prosjekt innanfor kategorien feltutbygging.

Bergverksdrift hadde på si side ein vekst på 3,5 prosent i den same perioden, medan produksjon innanfor norsk kraftforsyning auka med 3,1 prosent.