Næringsmiddelindustrien bidro til auke i industriproduksjonen i juli

Indeksnivået for industriproduksjonen var på 111,2 (2005=100) i perioden mai-juli 2020 mot 116,1 i føregåande tremånedersperiode. Figur 1 visar at dei sesongjusterte tala hadde ei relativt stabil utvikling i 2019 og fram til februar i år, før produksjonen fall kraftig frå og med mars 2020.

Månadsendring: auke i nokre næringar trekk opp samla produksjon

Sesongjusterte tal viser at industriproduksjonen samla sett hadde ein klar auke på 1,8 prosent frå juni til juli. Denne auken kjem etter fleire månader med lav produksjonsaktivitet i industrien. Det var næringsmiddel- og drikkevareindustrien som bidrog klart mest til den samla auken, etterfølgt av næringsgruppa oljeraffinering, kjemisk og farmasøytisk industri. Dei to næringsgruppene hadde produksjonsauke på 6 og 7,7 posent høvesvis. Auken i næringsmiddel- og drikkevareindustri heng saman med høg etterspurnad frå den norske daglegvarebransjen.

Sjølv om samla produksjon viste ein tydeleg vekst var det framleis fleire næringar som var sterkt prega av verknadane av koronapandemien også i juli. Metallvareindustrien og maskinindustrien var blant dei som hadde produksjonsnedgang og bidrog mest til å dempe den samla auken.

Tremånadsendring: kraftig fall i industriproduksjonen

Sesongjusterte tal viser at industriproduksjonen gjekk ned med heile 4,2 prosent i perioden mai-juli samanlikna med førre tremånadersperiode. Nedgangen må sjåast i samanheng med verknadane av koronapandemien som har prega aktiviteten i industrien sidan midten av mars. Det var næringsgruppa oljeraffinering, kjemisk og farmasøytisk industri som bidrog mest til nedgangen i denne perioden med eit fall på 7,7 prosent. I tillegg har fleire arbeidsintensive næringar opplevd stor nedgang i perioden, deriblant fleire av næringane innafor petroleumsretta leverandørindustri.

Månadsendring: solid auke i Eurosona i juni 2020

Estimerte tal frå Eurostat, statistikkontoret i EU, viser at den samla industriproduksjonen i land i eurosona auka med heile 10 prosent frå mai til juni 2020. Dermed fortsatt auken som starta i mai, etter to månader med kraftig produksjonsfall som en følgje av dei ulike tiltaka som vart sette i verk for å hindre spreiinga av koronaviruset. Samanlikna med juni i fjor er likevel produksjonsaktiviteten framleis lav.

I den same perioden hadde industriproduksjonen i Noreg ein liten auke på 0,2 prosent. Sverige og Danmark hadde ein produksjonsauke på 9,3 og 4 prosent høvesvis.

For meir informasjon om utviklinga i europeisk industriproduksjon i juni, sjå denne artikkelen frå Eurostat.

Tremånadersendring: nedgang i samla produksjonsindeks

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein nedgang på 1,7 prosent i perioden mai-juli 2020 samanlikna med førre tremånadersperiode, viser sesongjusterte tal. Utvinning av råolje hadde ein oppgang på 2,6 prosent, medan utvinning av naturgass gjekk ned 3,7 prosent. For fleire detaljar om olje- og gassproduksjonen i denne perioden, sjå pressemelding frå Oljedirektoratet.

Utvinningstenester opplevde ein kraftig nedgang på heile 11 prosent i perioden mai-juli samanlikna med førre tremånadersperiode. Strengje smittevernsreglar og den låge oljeprisen er med på å forklare nedgangen.

Bergverksdrift hadde ein nedgang på 9,7 prosent i same periode, medan det for norsk kraftforsyning var ein vekst på over 3,6 prosent.