Produksjonsauke i industrien

Indeksnivået for industriproduksjonen var på 118,2 (2005=100) i perioden desember 2018-februar 2019 mot 117,3 i føregåande tremånadersperiode. Den langsiktige trenden har vist ein auke sidan tidleg i 2018, som også kjem fram i  figur 1.

Tremånadersendring: oppgang blant fleire næringar

Sesongjusterte tal viser at industriproduksjonen hadde ein auke på 0,8 prosent i perioden desember 2018-februar 2019 samanlikna med førre tremånadersperiode. Det var god vekst hos fleire næringar, og dei to som bidrog mest til auken var metallvareindustrien og bygging av skip og oljeplattformer. Her var det vekst på høvesvis 5,2 og 9,1 prosent.  Samla sett hadde den petroleumsretta leverandørindustrien ein produksjonsauke på 4,3 prosent.

På den motsette sida, ble den samla oppgangen i industrien dempa av lågare produksjon i næringsgruppa oljeraffinering, kjemisk og farmasøytisk industri. Næringsgruppa hadde ein nedgang på 4,7 prosent samanlikna med førre tremånadersperiode.

Månadsendring: marginal nedgang industriproduksjon frå januar til februar 2019

Sesongjusterte tal viser at den samla industriproduksjonen hadde eit lite fall frå januar til februar 2019, på 0,3 prosent. På næringsnivå vart februar ein månad med små endringar samanlikna med januar, og produksjonen heldt seg stabil i dei fleste næringane. Det var næringsmiddelindustrien som trakk den samla produksjonen mest i negativ retning, og metallvareindustrien som hadde det største bidraget i positiv retning.  

Auke i eurosona og uendra produksjon i Noreg i januar 2019

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein oppgang på 1,1 prosent frå desember 2018 til januar 2019. I den same perioden var produksjonen i Noreg tilnærma uendra.

Industriproduksjonen i Sverige hadde ein marginal auke i same periode, medan det i Danmark var ein tydeleg nedgang. 

Tremånadersendring: tydeleg nedgang i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein tydeleg nedgang på 3,2 prosent i perioden desember 2018-februar 2019 samanlikna med førre tremånadersperiode, viser sesongjusterte tal. Utvinning av råolje gjekk ned med 1,3 prosent, og utvinning av naturgass fall med 2 prosent. For fleire detaljar om olje- og gassproduksjonen i februar 2019 sjå pressemelding frå Oljedirektoratet.

Utvinningstenester på si side hadde ein tydelig auke på 4,6 prosent i perioden desember 2018-februar 2019 samanlikna med førre tremånadersperiode. Veksten heng mellom anna saman med høgare investeringsaktivitet i den norske olje- og gassnæringa.

Bergverksdrift hadde òg ei positiv utvikling i den same perioden og auka med 5,7 prosent, medan produksjon i norsk kraftforsyning gjekk ned med 10,2 prosent.