Skip og plattformer trekte industriproduksjonen opp

Indeksnivået for industriproduksjonen var på 116 (2005=100) i 3. kvartal 2018 mot 115,3 i det føregåande kvartalet.

Tremånadersendring: stor aktivitet i bygging av skip og oljeplattformer

Sesongjusterte tal viser at industriproduksjonen hadde ein auke på 0,6 prosent i 3. kvartal 2018 samanlikna med det føregåande kvartalet. Veksten kan særleg knytast til høg produksjon innanfor bygging av skip og oljeplattformer og i næringsgruppa oljeraffinering, kjemisk og farmasøytisk industri. Skips- og plattformproduksjon opplevde ein sterk auke på 6,2 prosent i 3. kvartal, særleg grunna stor aktivitet innanfor skipsbygging, men også plattformer bidrog positivt. Den  petroleumsretta leverandørindustri hadde samla sett ein produksjonsvekst på 1,1 prosent frå 2. til 3. kvartal 2018.

For næringsgruppa oljeraffinering, kjemisk og farmasøytisk industri var høg produksjon av farmasøytiske produkt ei viktig årsak til veksten i 3. kvartal. På den motsette sida bidrog næringsmiddelindustrien til å dempe veksten i den samla industriproduksjonen. Nedgangen heng saman med låg produksjon av kjøt og kjøtvarer.

Månadsendring: nedgang i næringsmiddelindustrien frå august til september

Sesongjusterte tal viser at den samla industriproduksjonen hadde ein liten nedgang på 0,3 prosent frå august til september 2018. Næringsmiddelindustrien opplevde eit klårt fall i denne perioden og bidrog mest til den samla nedgangen i industrien. På den andre sida hadde næringsgruppa oljeraffinering, kjemisk og farmasøytisk industri, og bygging av skip og oljeplattformer ein oppgang. 

Auke i eurosona, uendra industriproduksjon i Noreg i august

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein auke på 0,9 prosent frå juli til august 2018. I den same perioden var produksjonen i Noreg tilnærma uendra med eit lite fall på 0,2 prosent.

To av nabolanda våre, Sverige og Danmark, hadde noko ulik utvikling i industriproduksjonen frå juli til august. Medan Sverige hadde ein liten auke på 0,6 prosent, hadde Danmark ein nedgang på 1,2 prosent. 

Tremånadersendring: vekst i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein vekst på 1,4 prosent i 3. kvartal 2018 samanlikna med det føregåande kvartalet, viser sesongjusterte tal. Utvinning av råolje hadde ein auke på 2,1 prosent, medan utvinning av naturgass voks med 4,5 prosent. For fleire detaljar om olje- og gassproduksjonen i september 2018 sjå pressemelding frå Oljedirektoratet.

Innanfor utvinningstenester var produksjonen tilnærma uendra i 3. kvartal samanlikna med 2. kvartal. Bergverksdrift på si side opplevde eit kraftig fall på 5,9 prosent i den same perioden, medan produksjonen innanfor norsk kraftforsyning hadde ein tydeleg oppgang på 5,3 prosent. Veksten i 3. kvartal innanfor kraftforsyning må sjåast i samanheng med svært låg produksjon i kvartalet før, som vart prega av svært lite nedbør.