Stabil utvikling i industriproduksjonen

Indeksnivået for industriproduksjonen var på 118,3 (2005=100)  i perioden februar-april 2019 mot 118,2 i føregåande tremånadersperiode. Glatta sesongjusterte tal viser no ein svak auke i trenden for dei siste tre månadene (sjå figur 1).

Tremånadersendring: auke i petroleumsretta leverandørindustri

Sesongjusterte tal viser at industriproduksjonen var nær uendra i perioden februar-april 2019, samanlikna med førre tremånadersperiode. Næringar som dataindustri og elektrisk utstyrsindustri, samt bygging av skip og oljeplattformer hadde ein tydeleg oppgang i perioden, med ein auke på høvesvis 2,8 og 7,1 prosent. Samla sett hadde den petroleumsretta leverandørindustrien ein klår produksjonsauke på 3,1 prosent.

På den andre sida bidrog næringsmiddelindustrien og næringsgruppa oljeraffinering, kjemisk og farmasøytisk industri til å trekke den samla industriproduksjonen i motsett retning, med ein nedgang på 2 prosent kvar.

Månadsendring: oppgang i industriproduksjon frå mars til april 2019

Sesongjusterte tal viser at den samla industriproduksjonen hadde ein auke på 2,2 prosent frå mars til april 2019. Det var ein brei vekst blant fleire av næringane, og blant dei som bidrog mest til auken finner vi mellom anna  næringsmiddelindustrien, maskinreparasjon og -installasjon, samt bygging av skip og oljeplattformer.

Stabil produksjon i eurosona og nedgang i Noreg i mars 2019

Estimerte tal frå Eurostat, statistikkontoret i EU, viser at den samla industriproduksjonen i land i eurosona var tilnærma uendra frå februar til mars 2019. I den same perioden var det ein nedgang i Noreg på 0,7 prosent.

Industriproduksjonen i Sverige hadde ein nedgang på 1,9 prosent i same periode, medan det i Danmark var ein oppgang på 1 prosent. 

Tremånadersendring: tydeleg fall i utvinning av råolje

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde eit tydeleg fall på 4,4 prosent i perioden februar-april 2019 samanlikna med førre tremånadersperiode, viser sesongjusterte tal. Utvinning av råolje fall betydeleg med 6,9 prosent, medan utvinning av naturgass gjekk ned med 1,9 prosent. For fleire detaljar om olje- og gassproduksjonen i april 2019 sjå pressemelding frå Oljedirektoratet.

Utvinningstenester på si side hadde ein auke på 3,8 prosent i perioden februar-april 2019 samanlikna med tremånadersperioden før. Veksten heng mellom anna saman med høgare investeringsaktivitet i den norske olje- og gassnæringa.

Bergverksdrift hadde ein positiv utvikling i den same perioden, og gjekk opp 3,1 prosent, medan produksjon i norsk kraftforsyning fall kraftig med 9,6 prosent. Nedgangen i kraftforsyning må sjåast i samanheng med ein relativt mild vinter, særleg i februar og mars.