Verftsindustrien trekte opp samla industriproduksjon

Indeksnivået for industriproduksjonen var på 118,1 (2005=100) i 4. kvartal 2018 mot 116,3 i det føregåande kvartalet. Dette er det høgaste indeksnivået registrert sidan 2. kvartal 2015. Den langsiktige trenden viser no ein oppgang sidan tidleg i 2018, som også kjem fram i figur 1.

Tremånadersendring: svært stor aktivitet i bygging av skip og oljeplattformer

Sesongjusterte tal viser at industriproduksjonen hadde ein auke på solide 1,5 prosent i 4. kvartal 2018 samanlikna med det føregåande kvartalet. Dette kjem etter produksjonsvekst i både 2. og 3. kvartal på høvesvis 1 og 0,8 prosent.

Veksten i 4. kvartal kan i sær knytast til ein auke på heile 8,8 prosent i næringa bygging av skip og oljeplattformer. Auken heng saman med ein merkbar aktivitet innanfor både skipsbygging og bygging av oljeplattformer. I tillegg bidrog også metallvareindustrien til den samla oppgangen med ein vekst på 3,5 prosent. Samla sett hadde den petroleumsretta leverandørindustrien ein sterk produksjonsauke i 4. kvartal på 3,3 prosent.

Årsendring: Klår auke i industriproduksjonen i 2018

Kalenderjusterte tal viser ei årsendring for industriproduksjonen på 1,7 prosent frå 2017 til 2018. Statistisk sentralbyrå vil torsdag 28. februar publisere ein eigen årsartikkel om den samla industriproduksjonen i 2018. 

Månadsendring: moderat produksjonsauke i desember

Sesongjusterte tal viser at den samla industriproduksjonen auka med 0,5 prosent frå november til desember 2018. Næringsgruppa gummi, plast og mineralsk industri saman med metallvare- og maskinindustrien bidrog til å trekke samla produksjon i positiv retning.

På den andre sida opplevde kjemiske råvarer ein nedgang og bidrog soleis til å dempe den samla aktiviteten. Nedgangen heng mellom anna saman med tekniske driftsstansar. 

Tydeleg nedgang i eurosona, uendra produksjon i Noreg i november

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein tydeleg nedgang på 1,7 prosent frå oktober til november 2018. I den same perioden var produksjonen i Noreg meir eller mindre uendra med ein liten auke på 0,1 prosent.

To av nabolanda våre, Sverige og Danmark, hadde begge ein liten nedgang i industriproduksjonen i den same perioden, på høvesvis 0,4 og 0,5 prosent. 

 

Tremånadersendring: ingen endringar i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) var uendra frå 3. til 4. kvartal 2018. Utvinning av råolje gjekk ned med 0,6 prosent, medan utvinning av naturgass fall med heile 10 prosent, viser sesongjusterte tal. For fleire detaljar om olje- og gassproduksjonen i desember 2018 sjå pressemelding frå Oljedirektoratet.

Utvinningstenester på si side hadde ein kraftig auke på 4,2 prosent i 4. kvartal 2018 samanlikna med det føregåande kvartalet. Bergverksdrift hadde òg ei positiv utvikling i den same perioden og auka med 3,7 prosent.

Norsk kraftforsyning hadde ein vekst på 6,1 prosent frå 3. til 4. kvartal 2018. Auken i næringa heng saman med svært låg produksjon i kvartalet før, som var prega av svært lite nedbør.