Lagerindeks for industri (opphørt), 4. kvartal 2002

Rapporterte tal for 4. kvartal 2002 syner ein moderat auke i samla lagerbehaldning for industrien. Behaldninga av varer i arbeid har ikkje vore større sidan 3. kvartal 2000 og er no om lag 21 prosent høgare - målt i løpande prisar - enn på same tid året før. I faste prisar utgjer dette ein auke på om lag 19 prosent.

Behaldninga av ferdigvarer innan metallindustrien veks

Samla lagerbehaldning for metallindustrien held fram med å vekse, men er framleis om lag 20 prosent lågare enn i 4. kvartal 2001. Auka lagre av ferdigvarer innafor produksjon av ikkje-jernhaldige metall er ei viktig årsak til denne utviklinga.

Reduserte lagre av varer i arbeid for maskinindustrien

Næringa maskinindustri melder om ein markert nedgang i lagerbehaldninga av varer i arbeid. Indikatoren har ikkje vore lågare sidan 3. kvartal 1996. Samla lagerbehaldning er om lag 30 prosent lågare - målt i faste priser - enn på same tid året før.

Høg aktivitet innan oljeplattformer og modular

Behaldninga av varer i arbeid hos produsentar av oljeplattformer og modular stig for femte kvartal på rad, og målt i løpande prisar utgjer dette ein auke på heile 109 prosent. Næringa oljeplattformer og modular er prega av at enkelte store aktørar har stor påverknad på totalbilete.

Auka behaldning av varer i arbeid for transportmiddelindustrien

Transportmiddelindustrien rapporterer om veksande lagre av varer i arbeid i 4. kvartal 2002, men det er framleis laber aktivitet i næringa. Samla lagerbehaldning er om lag 17 prosent lågare - målt i faste prisar - enn på same tid året før.