Omsetning i olje og gass, industri, bergverk og kraftforsyning, juni 2005

Innanfor norsk olje- og gassutvinning var omsetninga om lag 243 milliardar kroner frå januar til juni 2005, noko som var nær 24 prosent meir enn i same periode i fjor. Snittprisen per fat råolje har i første halvår 2005 vore nær 35 prosent høgare enn første halvår 2004. Produksjonen av olje var noko lågare, medan gassproduksjonen hadde ein auke.

Innsatsvarer

Omsetninga av innsatsvarer hadde ein auke gjennom første halvår i år samanlikna med same periode i fjor. Trelast- og trevareindustri og oljeraffinering og kjemisk industri hadde den største oppgangen, medan metallindustrien og treforedling hadde ein nedgang.

Investeringsvarer

Investeringsvarer hadde den største auken av varetypane i årets seks første månader. Det var metallvareindustrien og transportmiddelindustrien som hadde den største oppgangen av investeringsvarene. Høg ordreinngang i både heime- og eksportmarknaden gjer at omsetninga innanfor investeringsvarer venteleg vil auke vidare utover i 2005. Innanfor omsetning av investeringsvarer var det berre elektroteknisk og optisk industri som hadde ein nedgang gjennom første halvår i år.

Konsumvarer

Omsetninga av konsumvarer viste ein nedgang i første halvår i år samanlikna med same periode i fjor. Dette hang saman med nedgang i omsetninga innanfor næringsmiddelindustrien og i forlag og grafisk industri. Møbelindustri og annan industri og tekstil- og kleindustrien dempa nedgangen i omsetninga av konsumvarer i perioden.