Omsetning i olje og gass, industri, bergverk og kraftforsyning, juni 2006

Omsetninga av energivarer hadde ein auke på over 30 prosent i årets første seks månader frå same tid i fjor. Bedrifter innan olje- og gassutvinning står for om lag 80 prosent av den totale omsetninga av energivarer. Det er den høge råoljeprisen som trekk omsetninga kraftig opp. Gjennomsnittsprisen på råolje (brent blend) var 35,4 prosent høgare enn i første halvår 2005.

Auke innanfor alle varetypar

Investeringsvarer hadde den største auken av varetypane. Det var maskinvareindustrien, oljeplattformar og transportmiddelindustrien som hadde den største veksten og medverka til dei gode tala. Det er den høge ordreinngangen i både heime- og eksportmarknaden som har gjort at omsetninga av investeringsvarer har hatt ein auke i 2006.

Omsetninga av innsatsvarer hadde ein vekst gjennom første halvår i år samanlikna med same periode i fjor. Oljeraffinering og kjemisk industri og metallindustrien hadde den største oppgangen.

Industrinæringar som produserer konsumvarer hadde ein samla oppgang om lag 11 prosent i dei seks første månadene samanlikna med same periode i 2005. Nærings- og nytelsesmiddelindustrien har hatt ei god utvikling med ein vekst på 15,4 prosent. Hovudårsaka ligg i auken i omsetninga av fisk og fiskevarer.