Bruker nesten 4 milliardar på tannhelse i fylka

Det meste av utgiftene i den offentlege tannhelsetenesta blir brukt til å behandle pasientar. I 2018 gjekk om lag 2,8 milliardar kroner av samla brutto driftsutgifter med til pasientbehandling, viser nye tal frå statistikken Tannhelsetenesta.

Det er ein auke på 42 prosent sidan 2008. Samstundes er det utgiftene som ikkje er direkte knytt til omfanget av pasientbehandling som aukar mest relativt sett. Sidan 2008 har utgifter knytt til administrasjon, lokale og utstyr auka med 86 prosent, frå 500 millionar kroner til 900 millionar kroner.

Behandlar over ein million pasientar

Den offentlege tannhelsetenesta behandla i overkant av ein million pasientar i løpet av 2018. Det er ein auke på fem prosent sidan 2008.

Den største pasientgruppa er barn og unge i aldersgruppa 3–18 år. I denne gruppa var det rundt 7 av 10 som hadde blitt undersøkt eller behandla i 2018. I løpet av ein periode på tre år, har derimot dei aller fleste barn og unge vore innom tannlege eller tannpleiar for behandling. 

Tannhelsa til barn og unge blir stadig betre

Dei siste tretti åra har tannhelsa blant barn og unge generelt sett blitt betre. Det gjeld både blant 5-åringar, 12-åringar og 18-åringar, men spesielt positiv har utviklinga blant 18-åringar vore. Det er no ein større del utan hol i tennene enn nokon gong tidlegare.

I 1985 var det ein prosent som aldri hadde hatt hol i tennene. I 2018 hadde delen auka til om lag 27 prosent. Samstundes er det er færre med mange hol. Sidan 2001 har delen undersøkt 18-åringar med meir enn 9 hol gått ned frå 16 prosent til 7 prosent.