Solrik sommar ga meir frukt og mindre grønsaker

Tørkesommaren 2018 sette sitt preg også på grønsakavlingane, viser statistikken Hagebruksavlingar. Produksjonen av grønsaker på friland minka med 22 200 tonn frå 2017 til 149 900 tonn. Avlinga av sommarkål blei nær halvert samanlikna med året før, medan gulrotavlinga blei redusert med vel 30 prosent. For haust- og vinterkålen blei det ein reduksjon på knapt 20 prosent, og for isbergsalat ein nedgang på om lag 15 prosent.

Produksjonen av grønsaker i veksthus auka derimot med 4 prosent, til 42 200 tonn i 2018. Agurk og tomat utgjorde respektive 37 og 30 prosent av totalavlinga.

Gode fruktavlingar

Total produksjon av frukt er berekna til 18 500 tonn i 2018, som utgjer ein auke på 20 prosent frå året før. Eple utgjorde 81 prosent av den totale fruktproduksjonen, plomme 11 prosent og morellar 5 prosent.

Lågare bæravlingar

Totalavlinga av bær var 11 300 tonn i 2018. Det er 6 prosent mindre enn året før. Det var særleg produksjonen av bringebær som gjekk ned, frå 3 000 tonn i 2017 til 2 600 tonn i 2018. Produksjonen av jordbær var 8 000 tonn i 2018 mot 8 100 tonn året før.