6 prosent fleire medlemmar

I løpet av ein periode på 12 år har det samla talet på medlemmar i trus- og livssynssamfunn auka med over 70 prosent. Talet på medlemmar i 2018 var på over 655 000, medan det i 2006 var omlag 380 000 medlemmar i trus- og livssynssamfunn som mottek offentleg stønad, og er utanfor Den norske kyrkja.

Om lag 54 prosent var medlemmar av eit kristent samfunn, nær 26 prosent i eit muslimsk samfunn og om lag 15 prosent var medlemmar i eit livssynssamfunn, viser statistikken over trussamfunn.

Fleire medlemmar i kristne trussamfunn utan for Den norske kyrkja

Talet på medlemmar i kristne trussamfunn utanfor Den norske kyrkja auka med 5 prosent frå 2017 til 2018. Den tydelege trenden gjennom dei siste ti åra held dermed fram. Frå 2008 til 2018 har medlemstala auka med om lag 56 prosent. I 2018 er det over 355 000 medlemmar i dei kristne trussamfunna.

I motsetnad til det aukande talet medlemmar i kristne trussamfunn utanfor Den norske kyrkja, visar tala over medlemmar i Den norske kyrkja ein svak, men jamt minkande trend over dei siste ni åra. Frå 2008 til 2017 har talet på medlemmar i Den norske kyrkja minka med 5 prosent.

Av dei kristne samfunna utanfor Den norske kyrkja er det Den romersk-katolske kyrkja som er størst med over 152 000 medlemmar i 2018.