Bråstopp for overnattingsbransjen i april

Tal frå overnattingsstatistikken syner at det var gjort om lag 330 000 overnattingar ved kommersielle overnattingsverksemdene   i april i år. Det er heile 84 prosent færre enn i april i fjor.

- Dette fallet kommer etter ein svært krevjande mars månad, da overnattingane falt med 55 prosent samanlikna med mars 2019, seier rådgivar Jarle Kvile i SSB.

Utbrotet av koronaviruset og tiltak som vart innført for å stogge spreiinga nasjonalt og globalt fekk dramatiske konsekvensar for dei kommersielle overnattingsverksemdene. Talet på hotellovernattingar i april vart redusert med nesten 1,4 millionar – ein reduksjon på 87 prosent, samanlikna med april året før. Overnattingar på campingplassar gjekk ned 73 prosent, medan overnattingar på hyttegrender og vandrarheimar gjekk ned 81 prosent.

Mange stengde hotell

April var ein månad prega av mange stengde overnattingsverksemder. Fleire verksemder fekk pålegg av kommunelegen om å halde stengt for å hindre spreiing av koronavirus. Andre har vore stengde grunna reiserestriksjonar. Samanlikna med april 2019 var talet på opne overnattingsverksemder om lag 20 prosent lågare i april i år.

- Nedstenginga har vore særskilt stor i Oslo der to av tre hotell var stengd og i Innlandet der halvparten av hotella var stengd, fortel Kvile.

Det var ein kraftig reduksjon i hotellovernattingar i alle fylka. Størst var nedgangen på Svalbard og i Innlandet. Her vart talet på hotellovernattingar redusert med høvesvis 98 og 92 prosent. Rogaland hadde minst reduksjon med 71 prosent færre overnattingar.

Større del som overnatta på campingplassar

Bant dei som overnatta på kommersielle overnattingsverksemder i april var delen som overnatta på campingplassar høgare enn i april i fjor. Dette skuldast at nedgangen av overnattingar på campingplassar var noko lågare enn for dei andre innkvarteringstypane.

- Fleire campingplassar opna i slutten av april, og vi tenker at det ikkje er uventa at fleire av dei som valde å overnatte, valde camping, der man har eigen vogn eller bil. Det blir interessant å følje denne utviklinga framover dei neste månadane for å sjå om trenden fortsett, seier Jarle Kvile.