Norske overnattingar nær normalt nivå

Tal frå overnattingsstatistikken syner at det var om lag 2,3 millionar overnattingar ved kommersielle overnattingsverksemder i juni i år. Det er 45 prosent færre enn i juni i fjor. Dette fallet i overnattingar følgjer etter tre svært krevjande månader for overnattingsverksemdene, med eit fall på høvesvis 55, 84 og 62 prosent i mars, april og mai.

Utbrotet av koronaviruset og tiltak som vart innført frå mars for å stogge spreiinga nasjonalt og globalt fekk dramatiske konsekvensar for dei kommersielle overnattingsverksemdene. Restriksjonane som gjaldt i juni var særskilt knytt til innreise for utanlandske turistar, og det var nettopp fråværet av dei som førte til ein kraftig nedgang i totale overnattingar.

Auke i norske campingovernattingar

Det var 20 prosent fleire norske overnattingar på campingplassane i juni i år mot juni i fjor. Dette er ein del av ein lengre trend gjennom korona-pandemien, der vi har sett dei siste tre månadane, at campingovernattingar har hatt ein mindre nedgang enn dei andre overnattingsformene. Juni er tradisjonelt ein populær månad blant utanlandske turistar, men som følgje av pandemien fall totale overnattingar på campingplassar med 20 prosent.

Hotella fortsatt prega, men betring i juni

Det var heile 56 prosent færre overnattingar på norske hotell i juni i år mot same periode året før. Norske overnattingar fall med 37 prosent, medan utanlandske fall med heile 91 prosent. Alle formål for hotellovernattingar fall i juni, og overnattingar med ferie og fritid som formål fall med litt over 900 000, om lag det same som utanlandske overnattingar.

Ser vi på kor nordmenn overnatta i juni, var det store regionale skilnader. Der nedgangen var på høvesvis 64 og 59 prosent for Svalbard og Oslo, var det ein mindre nedgang i Agder og Nordland på 3,8 og 10 prosent. At nedgangen var minst i Agder og Nordland er kanskje ikkje uventa grunna populære reisemål for nordmenn i dei fylka.