![[Forrige artikkel]](/ukens_statistikk/gifs/previous.gif)
![[Innholdsfortegnelse]](/ukens_statistikk/gifs/up.gif)
![[Neste artikkel]](/ukens_statistikk/gifs/next.gif)
Talet på bruk med husdyr går ned. I fjor søkte 54 000 husdyrbrukarar om produksjonstillegg. Det er ein nedgang på 800 frå året før.
Det blir færre bruk med husdyr her i landet, men produksjonen av både svin og slaktekylling aukar.
Talet på alssvin har auka med 4 prosent frå 1994 og var 90 800 pr. 31. desember 1995. Talet på slaktesvin påsett i perioden 1. august til 31. desember i fjor var 559 800, ein auke på 6 prosent i høve til same periode året før. Auken i påsett av slaktesvin kjem av at dei som driv med slaktesvin auka buskapsstorleiken. Medan gjennomsnittleg påsett pr. driftseining var 89 slaktesvin i 1994, auka talet til 99 slaktesvin i fjor. Talet på slaktekyllingar har også auka. I perioden 1. august til 31. desember 1995 blei det sett på 8,6 millionar kyllingar, 11 prosent fleire enn i same periode året før. Av desse utgjorde slaktekyllingar av høns 97 prosent, medan kyllingar av kalkunar, ender og gjæser utgjorde 3 prosent.
Det blei søkt om produksjonstillegg for 1 012 000 storfe pr. 31. desember 1995. Av desse var 324 000 mjølkekyr og 20 000 ammekyr. Medan talet på mjølkekyr har gått ned 6 prosent sidan 1989, har talet på ammekyr blitt tredobla sidan 1989. Talet på vinterfôra sauer var 1,1 millionar i 1995, ein auke på 2 prosent i høve til året før.
Talet på høner var 3,5 millionar i 1995, ein nedgang på 2 prosent frå året før. Talet på mjølkegeit endra seg lite i høve til 1994. Pr. 31. desember i fjor var det 59 700 mjølkegeiter.
Rogaland var framleis det fylket som hadde flest husdyrbrukarar, 6 051, og i dette fylket var det også flest storfe, sau, svin og høner. Østfold hadde flest slaktekyllingar, medan Troms hadde flest mjølkegeiter samanlikna med andre fylke.