Obligasjonar og sertifikat, 2. kvartal 2013

Det vart registrert 286 emisjonar av obligasjonar og 263 emisjonar av sertifikat pålydande til saman 230 milliardar kroner i Noreg i 2. kvartal 2013. Lånevoluma var størst for obligasjonar. Rekna frå 2 kvartal 2012 gjekk det samla talet på emisjonar og beløp opp med høvesvis 12 og 2 prosent. Om lag 94 prosent av lånevolumet, 217 milliardar kroner, vart teke opp av innlendingar i 2. kvartal 2013. I den same perioden vart det registrert 343 emisjonar av obligasjonar og sertifikat som var utførte av norske einingar utanfor Noreg. Den samla verdien på emisjonane var 203 milliardar kroner. Talet på og beløpet for emisjonane gjekk ned med høvesvis 36 og 31 prosent frå 2. kvartal 2012 til 2. kvartal 2013.

Offentleg forvaltning tar opp mindre lån enn før

Offentleg forvaltning, som har vore dominerande i lånemarknaden innanlands i lang tid, stod for 53 prosent av emisjonsvolumet i Noreg i 2. kvartal 2013. Dette svarar til 121 milliardar kroner, ein nedgang i lånevolumet på 16 prosent samanlikna med 2. kvartal året før. Finansielle føretak stod for 25 prosent, eller 57 milliardar kroner, av lånevolumet. Dette er ein vekst på 15 prosent samanlikna med volumet i 2. kvartal året før. Ikkje-finansielle føretak stod for 17 prosent, som svarar til 38 milliardar kroner. Dette er ein vekst i lånevolumet på heile 55 prosent samanlikna med 2. kvartal 2012.

Finansielle føretak stod som tidlegare for den dominerande delen av emisjonar av obligasjonar og sertifikat i utlandet i 2. kvartal 2013. 71 prosent av det samla lånebeløpet, eller 143 milliardar kroner, vart emittert av norske bankar og kredittføretak.

Moderat vekst i obligasjons- og sertifikatgjeld teken opp av norske einingar

Den samla pålydande verdien av gjelda som skriv seg frå obligasjonar og sertifikat som er emitterte i Noreg, var på 1 839 milliardar kroner ved utgangen av 2. kvartal 2013. Dette er ein oppgang på vel 6 prosent frå utgangen av 2. kvartal året før. Finansielle føretak hadde mest gjeld, det vil seie 47 prosent, eller 858 milliardar kroner i 2. kvartal 2013. Offentleg forvaltning hadde nest mest gjeld, 28,5 prosent, eller 525 milliardar kroner. Marknadsverdien på gjelda frå obligasjonar som er emitterte i Noreg, låg i snitt 2,4 prosent over pålydande verdi. Marknadsverdien på gjelda for slike sertifikat var derimot 0,4 prosent under den pålydande verdien.

88 prosent, eller 1 626 milliardar kroner av gjelda frå emisjonar og sertifikat, som er emitterte innanlands, var registrert på norske låntakarar i 2. kvartal 2013, mot 90 prosent, eller 1 553 milliardar kroner i 2. kvartal året før. Norske låntakarar hadde i tillegg ei gjeld frå obligasjonar og sertifikat som er emitterte i utlandet, på 1 333 milliardar kroner, slik at samla gjeld ved utgangen av 1. kvartal 2013 var på 2 959 milliardar kroner. Samanlikna med 2. kvartal året før gjekk gjelda frå emisjonar av obligasjonar og sertifikat som er emitterte av norske einingar i Noreg og utlandet, opp med 0,6 prosent.

Nesten alle lån i Noreg blir tekne opp i norske kroner, mens dei fleste låna i utlandet blir tekne opp i annan valuta, anten euro, amerikanske dollar, britiske pund eller japanske yen. Om lag 39 prosent av gjelda som norske einingar har innanlands og utafor Noreg, har ein attverande løpetid på to år eller mindre.