Obligasjonar og sertifikat, 4. kvartal 2013

Det vart registrert 302 emisjonar av obligasjonar og 240 emisjonar av sertifikat pålydande til saman 190 milliardar kroner i Noreg i 4. kvartal 2013. 91 prosent av lånevolumet vart teke opp av innlendingar. Volumet på låna som vart tekne opp i Noreg, var størst for obligasjonar. Rekna frå 4. kvartal 2012 var talet for emisjonar om lag uendra, mens beløpet vart redusert med 17 prosent. I den same perioden vart det registrert 312 emisjonar av obligasjonar og sertifikat som var utførte av norske einingar utanfor Noreg. Den samla verdien på desse emisjonane var 210 milliardar kroner. Talet og beløpet på emisjonane gjekk opp med høvesvis 6 prosent og 14 prosent frå 4. kvartal 2012 til 4. kvartal 2013.

Offentleg forvaltning tok opp mindre lån, mens andre låntakarar tok opp meir

Offentleg forvaltning er framleis dominerande, men tar opp ein mindre del av verdipapirlåna innanlands enn tidlegare. Samla stod stats- og trygdeforvaltninga og kommuneforvaltninga for 48 prosent av emisjonsvolumet i Noreg i 4. kvartal 2013, mot 60 prosent i det same kvartalet året før. Dette kjem av mindre utskiftingar enn tidlegare av statskassevekslar i bytte mot obligasjonar med førerett . Finansielle føretak stod for i underkant av 28 prosent av lånevolumet. Dette er ein auke på 11 prosent samanlikna med volumet i 4. kvartal året før. Ikkje-finansielle føretak stod for om lag 16 prosent av lånevolumet, medan utlendingar hadde dei resterande 9 prosenta.

Finansielle føretak stod for den største delen av emisjonane av obligasjonar og sertifikat i utlandet i 4. kvartal 2013. 59 prosent av det samla lånebeløpet vart emittert av norske bankar og kredittføretak.

Vekst i obligasjons- og sertifikatgjeld teken opp av norske einingar

Den samla pålydande verdien av gjelda som skriv seg frå obligasjonar og sertifikat emitterte i Noreg, var på 1 873 milliardar kroner ved utgangen av 4. kvartal 2013. Dette er ein vekst i gjelda innanlands på vel 4 prosent frå utgangen av 4. kvartal året før. Finansielle føretak hadde som tidlegare mest gjeld, det vil seie 45 prosent i 4. kvartal 2013. Offentleg forvaltning hadde nest mest gjeld, med 29 prosent. Marknadsverdien på gjelda frå obligasjonar som er emitterte i Noreg, låg i snitt 1,5 prosent over pålydande verdi. Marknadsverdien på gjelda for slike sertifikat var derimot 0,4 prosent under den pålydande verdien.

1 642 milliardar kroner av gjelda frå obligasjonar og sertifikat som er emitterte innanlands, var registrerte på norske låntakarar ved utgangen av 4. kvartal 2013. Det utgjorde 88 prosent og var ein liten nedgang frå 89 prosent ved utgangen av 4. kvartal året før. Norske låntakarar hadde i tillegg ei gjeld frå obligasjonar og sertifikat som er emitterte i utlandet på 1 469 milliardar kroner, slik at samla gjeld ved utgangen av 2013 var på 3 111 milliardar kroner. Samanlikna med utgangen av 2012 gjekk gjelda frå emisjonar av obligasjonar og sertifikat til norske einingar i Noreg og utlandet opp med vel 5 prosent.