Elektrisitet, november 2002

Vi må attende til 1980 for å finne ein kaldare novembermånad, og dette slo ut i det andre høgaste forbruket som er registrert for denne månaden. Bruttoforbruket av elkraft var 11 804 GWh i november 2002, og det er 2,8 prosent meir enn for same månad i 2001, då temperaturen var over normalen. For totalforbruket utanom kraftintensiv industri er det i hovudsak temperaturen som påverkar forbruket på kort sikt, og i denne sektoren auka forbruket med 6,1 prosent i høve til den same månaden i 2001.

Høge kraftprisar kan ha dempa forbruksauken

På tross av auke i forbruket kan det vere at auka prisar og auka merksemd rundt kraftprisane tidlegare i haust, i tillegg til oppmodingar om å spare, har verka dempande på forbruket av elkraft i denne sektoren. Konsumprisindeksen viser at samla kraftpris til hushald i november 2002 var 7,6 prosent høgare enn for same månaden året før. Samla kraftpris inkluderer nettleige og avgifter i tillegg til sjølve kraftprisen.

Kraftintensiv industri brukte mindre elkraft

Forbruket i kraftintensiv industri er ikkje temperaturavhengig, og for denne sektoren fall forbruket med 8,3 prosent i høve til november 2001. Nedgangen i kraftintensiv industri kjem i hovudsak av mindre aktivitet i denne sektoren, ein trend som varte heile fjoråret. Noko kan koma av høge kraftprisar og overgang til bruk av andre energikjelder. Det totale salet av petroleumsprodukt i november 2002 auka med 45,3 prosent i høve til november året før. Salet av petroleumsprodukt til industri, bergverk og kraftforsyning auka med 77,4 prosent i høve til den same månaden 2001. Prisane for kraft i spotmarknaden viser at gjennomsnittsprisen i november var 31,7 øre/kWh, mot 17,0 øre/kWh i 2001. I 1996 var magasinfyllingane om lag dei same på denne tida, og spotprisen var då 22,6 øre/kWh i gjennomsnitt for novembermånaden. Høgare etterspurnad etter kraft i november 2002 i høve til november 1996 kan forklare noko av ulikskapen i pris mellom november 2002 og november 1996.

Produksjonen gjekk ned

Det vart produsert 11 855 GWh i november. Det er ein nedgang på 4,8 prosent i høve til den same månaden i 2001. November var ein uvanleg nedbørfattig månad. Vanlegvis vert november rekna som ein månad i "tappesesongen". I dei store tilsigområda kjem nedbøren i hovudsak i form av snø, som vil gje tilsig til magasina under vårsmeltinga. Lite nedbør i form av snø vil gje forventning om låge tilsig under smeltinga, og med det høgare verdi på vatnet på sikt, og dermed også gje høgare prisar i dag. I november låg den gjennomsnittlege terminprisen tre månader fram i tid over observerte spotprisar. Det indikerer at det kunne vere meir lønnsamt å halde att produksjonen i november for produksjonen seinare. Når ein held attende produksjon vil dette føre til ytterlegare prisauke i dag og lågare pris enn ein elles ville fått i framtida. Det vart importert 596 GWh og eksportert 646 GWh i november.

Sjå også

Vannmagasinenes fyllingsgrad og Priser på elektrisk kraft

Tabeller:

• Tabell 1 Produksjon, import, eksport og forbruk av elektrisk kraft. GWh. Førebelse tal