Produksjonsindeks for olje og gass, industri, bergverk og kraftforsyning, februar 2000

Innanfor produksjon av investeringsvarer har metallvare- , maskin- og transportmiddelindustrien hatt den sterkaste nedgangen gjennom det siste året. Transportmiddelindustrien har likevel ein betre ordresituasjon no enn i siste halvdel av 1998 og første halvdel av 1999. Denne auken kjem i hovudsak frå marknaden innanlands, og ser ut til å vere fordelt på fleire aktørar i næringa. Produksjonen i verkstadnæringane utanom oljeplattformer var likevel rundt 10 prosent lågare enn i februar 1999.

Lågare investeringar til feltutbygging i Nordsjøen gjennom 1999 har redusert produksjonen av investeringsvarer. Innanfor oljeplattformer har den eksisterande aktiviteten blitt noko utvida. Den var om lag 2 prosent lågare enn i same periode i fjor. Tilgangen på nye ordrar for oljeplattformer har hatt ein auke frå botnnoteringa i 4. kvartal 1998. Dette har likevel ikkje vore nok for ein auke i ordrereservane. Ein vidare nedgang i investeringsaktiviteten for år 2000 knytt til feltutbygging vil også virke negativt inn på aktiviteten i næringa.

Vekst i delar av industrien

Ein auke i den tradisjonelle vareeksporten gjennom det siste halve året har sikra delar av industrien ei positiv utvikling. Produksjonen av aluminium har auka med om lag 2 prosent i denne perioden. I februar i år var produksjonen om lag 5 prosent høgare enn i tilsvarande periode i fjor. Det har elles vore ein sesongjustert auke i nærings- og nytelsesmiddelindustrien på 1,1 prosent frå januar til februar i år. Dette heng saman med ein auke i produksjonen av kjøtt og fiskevarer i høve til same periode i fjor.