Produksjonsindeks for olje og gass, industri, bergverk og kraftforsyning, desember 2000

Produksjonen av investeringsvarer hadde ein nedgang på om lag 0,5 prosent, viser sesongjusterte tal. Dette heng saman med ei svak utvikling innanfor plattform- og metallvareindustrien gjennom 4. kvartal. Dette er knytt til lågare investeringar i feltutbygging i Nordsjøen gjennom 2000, samanlikna med året før. Produksjonen innanfor industrien var 3,3 prosent lågare i desember 2000 samanlikna med same månad året før, viser vekekorrigerte tal. Dette heng mellom anna saman med aktiviteten innanfor nærings- og nytingsmiddelindustrien.

Eksportindustri og produksjon av energivarer

Produksjonen innanfor industrien viste ein nedgang på 2,7 prosent frå 1999 til 2000, viser vekekorrigerte tal. Dette skjer sjølv om delar av den tradisjonelle eksportindustrien kan vise til ein liten auke gjennom 2000. Det har vore ein auke i produksjonen av energivarer på om lag 6,5 prosent gjennom 2000, viser vekekorrigerte tal. Ein auke i olje- og gassutvinninga har kome fordi fleire nye felt har starta med gassproduksjon gjennom året. Dette har gjeve ein rekordhøg gassproduksjon mot slutten av 2000. Det har elles vore ein auke på om lag 16 prosent i produksjonen av elektrisk kraft, samanlikna med 1999. Desse endringane gjer at samla produksjon innanfor olje- og gassutvinning, industri og bergverksdrift og kraftforsyning har hatt ein auke på om lag 3 prosent, trass i den svake utviklinga innanfor industrien.