Produksjonsindeks for olje og gass, industri, bergverk og kraftforsyning, januar 2001

Produksjonen innan nærings- og nytingsmiddelindustrien auka frå desember til januar, viser sesongjusterte tal, medan det har vore ein nedgang på om lag 1 prosent dei siste seks månadene. Dette er knytt til ein svak etterspurnad frå den norske marknaden. Fleire av verkstadnæringane kan også vise til ein liten auke inn i det nye året. Dette heng saman med ein viss betring av etterspurnaden gjennom siste del av 2000. Produksjonsveksten er førebels ikkje spesielt stor, og for plattformindustrien har det i det siste halve året vore ein nedgang på om lag 5 prosent. Sesongjusterte tal viser elles at produksjonen av ikkje-jernhaldige metall har hatt ein auke på om lag 1 prosent frå desember til januar, og ein auke med om lag 2 prosent gjennom dei seks siste månadene. Samla produksjon av innsatsvarer har hatt ei noko betre utvikling enn investeringsvarer, men begge har hatt nedgang gjennom dei seks siste månadene, viser sesongjusterte tal.

Vekekorrigerte endringstal

Vekekorrigerte tal for industrien viser at det har vore ein nedgang på om lag 5 prosent frå januar 2000 til januar i år. Desse endringstala tek ikkje omsyn til at 1. nyttårsdag i 2001 var på ein måndag, medan den i 2000 var på ein laurdag. Dette har virka inn på dei vekekorrigerte endringstala.

Ny kategori: Oljeraffinering og kjemisk industri

Publisering av eigne tal for oljeraffinering og kjemisk industri er fjerna frå og med januar 2001. Dette er gjort av omsyn til konfidensialitet for oppgåvegjevarar innan oljeraffinering. Det er difor laga eit nytt aggregat som heiter oljeraffinering og kjemisk industri, der tal for desse næringane er slått saman.