Produksjonsindeks for olje og gass, industri, bergverk og kraftforsyning, februar 2001

Produksjonen av norsk gass var i år om lag 30 prosent lågare i februar enn i januar. Dette heng saman med variasjonar i etterspurnaden innanfor dei eksisterande kontraktane på levering av gass til kontinentet. Prisen på norsk gass har vore høg i vinter, og det har vore levert store mengder i januar i år og desember i fjor. Samla er olje- og gassutvinninga noko mindre enn i tilsvarande periode i fjor, viser vekekorrigerte tal.

Endringar innan industrien frå januar til februar

Sesongjusterte tal for februar viser at det framleis er stor variasjon mellom næringane i industrien. Nærings- og nytingsmiddelindustrien har hatt ein auke på om lag 2 prosent frå januar til februar i år, viser sesongjusterte tal. Dette heng saman med ein auke innan produksjon av fisk og fiskevarer. Dette er knytt til sesongvariasjonar og ein låg produksjon i januar. Produksjonen innanfor treforedling kan vise til ein auke på om lag 1 prosent. Dette er knytt til god etterspurnad og auka produksjonskapasitet innan næringa. Transportmiddel og oljeplattformer kan òg vise til ein liten auke. Betra etterspurnad gjennom 2000 har verka inn på dette. Bygging av skip trekkjer opp produksjonen av transportmiddel. Endringane innanfor plattformnæringa er framleis små, og fleire verksemder slit enno med permitteringar. Ekstraordinære driftsproblem har redusert samla produksjon i oljeraffinering. Dette gjer at samla utvikling innanfor oljeraffinering og kjemisk industri blir negativ, sjølv om det har vore ein liten auke i produksjonen av kjemiske råvarer.

Endringar siste 12 månader

Produksjonen innanfor industrien har vore om lag uendra frå februar i fjor til februar i år, viser vekekorrigerte tal. Treforedling, forlag og grafisk industri, kjemiske råvarer og maskinindustrien har hatt ein auke i denne perioden. Metallindustri og plattformindustri har hatt ein klår nedgang sidan februar i fjor. Delar av metallindustrien slit framleis med tilgang på råstoff. Dette har verka inn på samla produksjon i denne næringa.