Produksjonsindeks for olje og gass, industri, bergverk og kraftforsyning, november 2002

Produksjonen av konsumvarer har gått ned med 1,2 prosent i perioden januar til november 2002 samanlikna med same periode i 2001, viser vekekorrigerte tal. Dette heng spesielt saman med ei svak utvikling innanfor produksjonen av varige konsumvarer, men også produksjonen av ikkje-varige konsumvarer viste nedgang. For ikkje-varige konsumvarer er nedgangen knytt til aktiviteten innanfor næringsmiddelindustrien og i forlag og grafisk industri. For varige konsumvarer var det produksjonen innanfor møbelindustrien som var hovudårsaka.

Auke i produksjonen av investeringsvarer

Det har vore ein auke på 1,7 prosent i produksjonen av investeringsvarer frå januar til november 2002 samanlikna med same periode i 2001, viser vekekorrigerte tal. Dette heng saman med ein klår produksjonsauke innanfor oljeplattformer.

Negativ utvikling for konsumvarer

Det har vore ein nedgang på om lag 4 prosent i produksjonen av konsumvarer dei tre siste månadene samanlikna med månadene før, viser sesongjusterte tal. Varige konsumvarer har i denne perioden hatt ein nedgang på om lag 6 prosent knytt til ei svak utvikling innanfor møbelindustrien. Ikkje-varige konsumvarer har hatt ein nedgang på 3,6 prosent.