Produksjonsindeks for olje og gass, industri, bergverk og kraftforsyning, september 2003

Innsatsvarer har hatt ein auke på rundt 3 prosent. Dette heng saman med ein auke innanfor treforedlinga og metallindustrien. Desse endringane er særskild knytte til ein høg aktivitet i juli 2003. Det har vore ein liten nedgang i august og september for desse næringane, men kvartalstala blir framleis klart positive. Marknadstilhøva for treforedling og aluminium er ikkje vurderte som særskild annleis i 3. kvartal enn tidlegare i år, men i høve til i fjor er dei vurderte som noko betre. Produksjonen av innsatsvarer hadde ein liten auke i 2. kvartal også, medan det var nedgang i 1. kvartal i år samanlikna med kvartalet før. Vekekorrigerte tal for 3. kvartal 2003 viser likevel at produksjonen av innsatsvarer framleis er om lag 1 prosent lågare enn i same periode i fjor.

Ny auke for investeringsvarer

Oljeplattformer og elektroteknisk og optisk industri skaper ein ny auke for investeringsvarer i 3. kvartal i år. Dette kjem etter to svake kvartal med klar nedgang tidlegare i 2003. Ein auke i aktiviteten for oljeplattformer heng saman med investeringsnivået i landanlegg, felt i drift og felt under utbygging. Aktiviteten er aukande for fleire aktørar og ein del permitterte frå tidlegare i år er komne tilbake i arbeid. Det har elles vore ein svak auke i sysselsetjinga i elektroteknisk og optisk industri. Vekekorrigerte tal for 3. kvartal i år viser likevel at produksjonen av investeringsvarer framleis er om lag 7 prosent lågare enn i same kvartal i fjor. Dette heng mellom anna saman med særskild svake tal for produksjon av transportmiddel, som har hatt ein nedgang på over 12 prosent sidan 3. kvartal i fjor.

Produksjon av konsumvarer

Ikkje-varige konsumvarer sørgjer for ein auke for konsumvarer i 3. kvartal i år. Forlag og grafisk og møbelindustrien har hatt ein auke, medan det har vore ein mindre auke i nærings- og nytingsmiddelindustrien. Nokre produsentar innanfor møbelindustrien kan vise til ein situasjon med ein betra etterspurnad frå eksportmarknaden. Produksjonen av konsumvarer er likevel om lag 2 prosent lågare enn i same kvartal i fjor, viser vekekorrigerte tal.