Produksjonsindeks for olje og gass, industri, bergverk og kraftforsyning, februar 2004

Produksjonen av investeringsvarer har hatt ein auke på 0,8 prosent. Oljeplattformer held aktiviteten oppe, medan produksjon av transportmiddel framleis er svært låg etter ein ny nedgang. Fleire av bedriftene i plattformindustrien melder om ei viss betring i aktiviteten i høve til situasjonen for nokre månader sidan. Dette kjem etter ei betring i ordretilgangen i 4. kvartal i fjor. Dette vil venteleg halde produksjonen på eit stabilt nivå framover. Produksjonen av oljeplattformer er framleis lågare enn på same tid i fjor, viser vekekorrigerte tal. Den særskild svake situasjonen for mange norske skipsverft verkar framleis klart inn på produksjonen av transportmiddel, trass i ei viss betring av ordresituasjonen. Produksjonen innanfor transportmiddel er om lag 20 prosent lågare enn i same periode i fjor.

Produksjon av investeringsvarer

Dersom vi ser nærare på norsk produksjon av investeringsvarer er det framleis nedgang i maskinindustrien, viser sesongjusterte tal for februar. Elektroteknisk og optisk industri skil seg ut med ein auke på nesten 3 prosent. Samla aktivitet i norsk produksjon av investeringsvarer er framleis klart lågare enn på same tid i fjor, viser vekekorrigerte tal.

Produksjon av konsumvarer

Det har vore ein auke i produksjonen av konsumvarer på om lag 1 prosent i februar, viser sesongjusterte tal. Dette er knytt til produksjonen i norsk møbel- og næringsmiddelindustri gjennom ei betring i etterspurnaden for desse næringane.

Produksjonsindeksen for januar 2004

Produksjonsindeksen for januar 2004 er no berekna på nytt. Dette er knytt til ny informasjon om norsk kraftforsyning. Det er ikkje gjort større endringar i tala elles.