Produksjonsindeks for olje og gass, industri, bergverk og kraftforsyning, desember 2004

Norsk produksjon av investeringsvarer har hatt ein auke på 3,1 prosent i fjerde kvartal 2004, samanlikna med kvartalet før. Dette er mellom anna knytt til ein vekst i transportmiddel på 4,4 prosent, som heng saman med den aukande etterspurnaden retta mot bygging og særskild utrusting av skip i Noreg gjennom 2004. Endringane skjer frå eit lågt aktivitetsnivå i næringa, og verksemd knytt til nye kontraktar vil først kome i gang for alvor i 2005. Det har også vore vekst i maskin- og metallvareindustrien.

Innsatsvarer

Det har vore ein auke på 0,5 prosent i norsk produksjon av innsatsvarer gjennom fjerde kvartal 2004 samanlikna med kvartalet før. Dette heng saman med ein auke i produksjonen av trelast og trevarer, grunna den aukande byggjeaktiviteten gjennom 2004. Det har også vore ein auke i oljeraffinering og kjemisk industri. Produksjonen av ikkje-jarnhaldige metall viser berre små endringar gjennom kvartalet. Dette heng saman med ein liten nedgang i produksjon av varer av aluminium i siste kvartal av 2004.

Konsumvarer

Produksjonen av varige konsumvarer har hatt ein nedgang frå tredje til fjerde kvartal 2004. Dette heng saman med produksjonen i norsk møbelindustri som viser ein nedgang gjennom siste kvartal. Det har også vore ein nedgang i nærings- og nytingsmiddelindustrien der mellom anna produksjon av kjøtt og kjøttvarer har hatt ein nedgang.

Innsatsvarer og konsumvarer i 2004

Det har vore ein auke på 1,4 prosent i norsk industriproduksjon samanlikna med året før, viser vekekorrigerte tal. Dette heng saman med ein auke i norsk produksjon av innsatsvarer og konsumvarer.

Innsatsvarer har hatt ein auke på 3,6 prosent. Ein viktig årsak er god eksportretta etterspurnad og ein auka produksjonskapasitet av ikkje-jarnhaldige metall. Trelastindustrien har også hatt auke. Veksten innanfor konsumvarer heng mellom anna saman med ein auke i norsk møbelproduksjon samanlikna med året før.

Investeringsvarer i 2004

Norsk produksjon av transportmiddel har hatt ein klar nedgang i 2004 samanlikna med året før. Plattformindustrien har hatt ei meir jamn utvikling med berre ein liten nedgang sidan 2003. Dette er knytt til omfanget av utbygging av olje- og gassfelt på norsk kontinentalsokkel.