Produksjonsindeks for olje og gass, industri, bergverk og kraftforsyning, oktober 2006

Investeringsvarer hadde ein auke på 2,2 prosent. Dette heng saman med den særs høge aktiviteten i norsk plattform- og metallvareindustri i 2006. Den aukande etterspurnaden etter verkstadprodukt frå utlandet gjennom 2006 har gjeve grunnlag for vekst i produksjonen i maskinindustrien på 1,1 prosent samanlikna med mai til og med juli i år.

Auke for innsats- og konsumvarer

Det var ein vekst på 1,9 prosent i produksjonen av innsatsvarer i den siste perioden på tre månader samanlikna med perioden før. Trelast- og trevareindustrien hadde ein oppgang saman med gummivare- og plastindustri og mineralproduktindustrien. Desse endringane kan knytast til den høge byggjeverksemda i Noreg. Innan kjemiske råvarer og ikkje-jarnhaldige metall gjekk produksjonen noko ned.

Produksjonen av konsumvarer viste ein auke på 0,3 prosent for august til og med oktober i år samanlikna med perioden før. Nærings- og nytingsmiddelindustrien hadde ein liten nedgang, medan forlag og grafisk industri kunne vise til ein vekst i produksjonen. Møbelindustrien hadde og ein oppgang i produksjonen i den siste perioden.

Norsk industri samanlikna med eurosona

Norsk industriproduksjon hadde ein vekst på 3,9 prosent frå september 2005 til september 2006, viser vekekorrigerte tal frå produksjonsindeksen for industrien. Statistikk frå Eurostat viser at industriproduksjonen i land i eurosona hadde ein oppgang på 3,3 prosent i same tidsrom.

Tabeller