Produksjonsindeks for olje og gass, industri, bergverk og kraftforsyning, november 2006

Produksjonen av investeringsvarer hadde ein auke på 2,8 prosent i denne siste perioden. Dette hang mellom anna saman med ein ytterlegare vekst i transportmiddel- og maskinindustrien. Den svært gode ordresituasjonen for bygging og utrusting av forsynings- og spesialfartøy til oljeverksemda i 2006 har gjeve grunnlaget for dette. Det har samstundes vore ein aukande etterspurnad frå utlandet etter norske verkstadprodukt. Den særs høge aktiviteten innan norsk plattform- og metallvareindustri har også helde fram for september til og med november 2006. Desse næringane hadde ein auke på høvesvis 2,9 og 3,4 prosent samanlikna med juni til og med august 2006. Det er berre elektroteknisk og optisk industri som har hatt ein liten nedgang i aktiviteten i den siste perioden.

Oppgang for innsats - og konsumvarer

Det var ein auke på 2,7 prosent i produksjonen av innsatsvarer i den siste perioden på tre månader samanlikna med perioden før. Trelast- og trevareindustrien hadde ein vekst på 7,4 prosent. Dette kan knytast til den høge byggjeverksemda i Noreg. Innan kjemiske råvarer og ikkje-jarnhaldige metall var produksjonen om lag uendra. Produksjonen i norsk treforedlingsindustri gjekk opp med 2,7 prosent. Dette kom etter ein klår nedgang tidlegare i 2006.

I konsumvarer var det ein oppgang på 0,9 prosent i produksjonen for september til og med november 2006 samanlikna med perioden før. Nærings- og nytingsmiddelindustrien hadde ein nedgang på 2,1 prosent, medan forlag og grafisk industri kunne vise til ein liten vekst i produksjonen. Det var elles ein klår auke i produksjonen i norsk møbelindustri i den siste perioden på tre månader.

Norsk industri samanlikna med eurosona

Norsk industriproduksjon hadde ein vekst på 7,5 prosent frå oktober 2005 til oktober 2006, viser vekekorrigerte tal frå produksjonsindeksen for industrien. Statistikk frå Eurostat viser at industriproduksjonen i land i eurosona hadde ein oppgang på 3,6 prosent i same tidsrom.

Tabeller