Produksjonsindeks for olje og gass, industri, bergverk og kraftforsyning, juni 2007

Sesongjusterte tal viste ein vekst i produksjonen av investeringsvarer på 4,3 prosent i andre kvartal, samanlikna med første kvartal 2007. Alle næringar som produserer investeringsvarer, hadde ein auke.

Produksjonen av innsatsvarer gjekk ned med 1,1 prosent i den same perioden. Mykje av nedgangen har si årsak i ein innarbeidd vedlikehaldsstans i produksjonen av kjemiske råvarer i andre kvartal. Det var ein nedgang i produksjonen av konsumvarer på 0,5 prosent i 2. kvartal i år, samanlikna med kvartalet før.

Godt halvår for investeringsvarer

Produksjonen av investeringsvarer gjekk opp med 9,9 prosent i første halvår 2007 samanlikna med første halvår 2006, viser virkedagskorrigerte tal. Oljeplattformer, maskin- og transportmiddelindustrien bidrog mest til dei gode produksjonstala for investeringsvarer. Svært høge investeringar i norsk oljeverksemd over fleire år og ein særskild god ordresituasjon for bygging og utrusting av skip i Noreg har virka inn på denne veksten.

Produksjon av innsatsvarer auka med 3,7 prosent i første halvår 2007 samanlikna med den same perioden i fjor. Trelast- og trevareindustri hadde ei sterk utvikling med ein vekst på 6,9 prosent. Produksjon av konsumvarer gjekk opp med 3,1 prosent. Det var særleg varige konsumvarer som bidrog til dette, med ein vekst på heile 10,9 prosent.

Noreg føre eurosona

Norsk industriproduksjon hadde ein oppgang på 5,2 prosent frå mai 2006 til mai 2007, viser virke-dags-korrigerte tal. Statistikk frå Eurostat legg til grunn at industriproduksjonen i land i eurosona hadde ein oppgang på 2,5 prosent i det same tidsrommet.

Tabeller