Produksjonsindeks for olje og gass, industri, bergverk og kraftforsyning, september 2007

Samla produksjon av investeringsvarer var framleis rekordhøg, og den auka ytterlegare med 1,7 prosent samanlikna med andre kvartal i år. Dette hang mellom anna saman med ein vidare vekst i maskinindustrien og i transportmiddelindustrien. Det var elles ein mindre oppgang i norsk plattformindustri i tredje kvartal i år etter ein klar vekst tidlegare i 2007.

Høge investeringar

Høge investeringar i feltutbygging på norsk sokkel og tilhøyrande landanlegg gjennom dei siste åra og store leveransar til internasjonal olje- og gassverksemd har hovudsakleg sørga for den rekordhøge produksjonen av investeringsvarer i 2007. Det har samstundes vore ein stor etterspurnad etter norske verkstadprodukt i utlandet elles.

Produksjonen av innsatsvarer gjekk opp med 0,9 prosent i tredje kvartal samanlikna med perioden før. Dette var knytt til ein auke i kjemiske råvarer og i ikkje-jarnhaldige metall. Elles var det ein nedgang i produksjonen i treforedling grunna ein svak internasjonal etterspurnad. Innan norsk trelast- og trevareindustri gjekk produksjonen også noko ned i tredje kvartal i år samanlikna med perioden før.

Litt ned for norsk næringsmiddelindustri

Det var ein nedgang i produksjonen av konsumvarer på 0,8 prosent i tredje kvartal i år samanlikna med kvartalet før. Produksjonen i norsk næringsmiddelindustri gjekk litt ned, medan aktiviteten i forlag og grafisk industri var om lag uendra.

Vekst sidan september 2006

Det var ein vekst på 4,0 prosent i norsk industriproduksjon frå september 2006 til september 2007, viser virkedagskorrigerte tal. Investeringsvarer hadde ein auke på 8,4 prosent, medan det var ein oppgang på 4,2 prosent i produksjonen av innsatsvarer og 1,2 prosent for konsumvarer.

Norsk industri samanlikna med eurosona

Norsk industriproduksjon auka med 4,2 prosent frå august 2006 til august 2007, viser virkedagskorrigerte tal. Statistikk fra Eurostat legg til grunn at industriproduksjonen i land i eurosona gjekk opp med 4,7 prosent i same tidsrom.

Tabeller