Produksjonsindeks for olje og gass, industri, bergverk og kraftforsyning, januar 2010

Det var ein vekst på 7,1 prosent i norsk metallindustri i denne siste perioden grunna ei viss betring i etterspurnaden. Samla produksjon av metallar var framleis klart lågare enn tida før finanskrisa. I ikkje-jarnhaldig metallindustri var det ein vekst på 3,5 prosent. Produksjonen av kjemiske råvarer har også hatt ein klar oppgang på 13,5 prosent, mellom anna knytt til vidare vekst i solcellerelatert verksemd.

Nedgang for skip og plattformer

Produksjonen av skip og plattformer gjekk ned med 4,4 prosent frå november 2009 til og med januar 2010 samanlikna med månadene før. Dette heng saman med den låge ordretilgangen og det markerte fallet i ordrereservane gjennom 2009 for denne næringa ( Sjå Ordrestatistikk for 4. kvartal 2009 ). Dette har virka inn på verkstadnæringane elles. Produksjonen i maskinindustri og metallvareindustri gjekk til dømes ned med 1,2 og 1,0 prosent den siste perioden.

Kulda virka inn på produksjonen

Næringsmiddelindustrien hadde ein nedgang i produksjonen på 1,4 prosent frå november 2009 til og med januar 2010 samanlikna med dei førre tre månadane. Det har også vore ein nedgang i gummi-, plastindustri og mineralsk industri på 5,8 prosent. Streng kulde i januar 2010 har virka inn på norsk byggeverksemd og dermed etterspurnaden etter mineralprodukt. Kuldeperioden har også dempa aktiviteten i næringsmiddelindustrien gjennom problem for slakteriverksemda.

Nedgang frå januar 2009 til januar 2010

Virkedagskorrigerte tal viser at produksjonen i industrien gjekk ned med 1,9 prosent frå januar 2009 til januar 2010. Det var ein klar vekst i næringar som metallindustri og kjemiske råvarer, medan produksjonen i bygging av skip og plattformer gjekk ned med 9,3 prosent.

Frå desember 2009 til januar 2010

Sesongjusterte tal viser at det var ein nedgang i norsk industriproduksjon på 0,4 prosent frå desember 2009 til januar 2010. Næringsmiddelindustrien og bygging av skip og plattformer hadde ein nedgang, medan produksjonen i kjemiske råvarer gjekk opp.

Norsk industri samanlikna med eurosona

Norsk industriproduksjon gjekk ned 2,6 prosent frå desember 2008 til desember 2009, viser virkedagskorrigerte tal. Statistikk frå Eurostat legg til grunn at industriproduksjonen i land i eurosona gjekk ned med 5,1 prosent i same tidsrom.