Produksjonsindeks for olje og gass, industri, bergverk og kraftforsyning, desember 2015

Indeksnivået for industriproduksjonen var på 115,9 (2005= 100) i 4. kvartal 2015, mot 117,6 i 3. kvartal. Dette er det lågaste nivået i eit kvartal sidan 2. kvartal 2012.

Tremånadsendring: Nedgang i oljerelatert industri

Sesongjusterte tal viser eit fall i industriproduksjonen på 1,4 prosent i 4. kvartal 2015 samanlikna med 3. kvartal. Nok ein gong er det låg produksjon blant leverandørar til olje- og gassektoren som forklarar mykje av nedgangen. Denne kjem særleg innanfor næringane maskinreparasjon og -installasjon i tillegg til bygging av skip og oljeplattformer. Produksjonen i desse næringane fall med høvesvis 9,7 og 4,4 prosent frå 3. til 4. kvartal og er sterkt knyta til den reduserte investeringsaktiviteten i norsk olje- og gassektor. Dette har mellom anna ført til permitteringar og ein tydeleg nedgang i bruken av innleigd arbeidskraft. I den same perioden var det òg ein produksjonsnedgang i maskinindustrien.

Næringsmiddel- og drikkevareindustri var saman med papir- og papirvareindustri blant dei få næringane som hadde produksjonsauke frå 3. til 4. kvartal i 2015. Dei bidrog slik til å dempe det samla fallet i norsk industriproduksjon.

Årsendring: Klår nedgang i industriproduksjonen i 2015

Kalenderjusterte tal viser ei årsendring for industriproduksjonen på -3,5 prosent frå 2014 til 2015. Statistisk sentralbyrå vil tysdag 23. februar publisere ein eigen årsartikkel om den samla industriproduksjonen i 2015.

Månadsendring: Moderat fall frå november til desember 2015

Sesongjusterte tal viser at industriproduksjonen frå november til desember 2015 hadde ein liten nedgang på 0,3 prosent. Fallet kjem mellom anna frå næringane bygging av skip og oljeplattformer og metallindustrien. Samstundes var det ein forholdsvis tydeleg oppgang i næringsgruppa oljeraffinering, kjemisk og farmasøytisk industri. Dette heng mellom anna saman med høg produksjon av kjemiske råvarer i desember.

Tolvmånadsendring: Tydeleg fall i Noreg mot vekst i eurosona i november 2015

Frå november 2014 til november 2015 gjekk norsk industriproduksjon ned 6,6 prosent, ifølgje kalenderjusterte tal. Bygging av skip og oljeplattformer bidrog saman med maskinindustrien mest til nedgangen. Estimerte tal frå Eurostat, statistikkontoret i EU, viser at industriproduksjonen i land i eurosona auka med 1,6 prosent i den same perioden.

Tremånadsendring: Tydeleg nedgang i den samla produksjonsindeksen (PII)

Produksjonsindeksen for olje- og gassutvinning, industri, bergverksdrift og kraftforsyning samla (PII) fall heile 3,2 prosent i 4. kvartal i 2015 samanlikna med 3. kvartal, ifølgje sesongjusterte tal. Utvinninga av råolje var uendra, medan produksjon av naturgass gjekk ned 8,7 prosent. Det er nedgangen i naturgassproduksjonen som veg mest i fallet i PII i 4. kvartal 2015. For fleire detaljar om olje- og gassproduksjonen i desember 2015 sjå pressemelding frå Oljedirektoratet.

Innanfor utvinningstenester var det ein nedgang i produksjonen på heile 9,0 prosent frå 3. til 4. kvartal 2015. Verksemdene innanfor denne næringa leverer tenester til olje- og gassektoren, og produksjonsnedgangen har sterk samanheng med den lågare investeringsaktiviteten i denne sektoren.

Sesongjusterte tal viser at norsk kraftforsyning hadde ein nedgang i produksjonen på 1,5 prosent frå 3. til 4. kvartal 2015, medan produksjonen i bergverksdrift fall kraftig med heile 10,8 prosent.