Spesialisthelsetjenesten, 2000

Personellinnsatsen i psykiatrien, målt i årsverk, har vist ein stigande tendens i heile tiårsperioden frå 1990 til 2000. Ved utgangen av 1990 var det til saman nesten 14 500 årsverk knytt til psykiatriske institusjonar, avdelingar og poliklinikkar, og av desse var nesten 1 500 i barne- og ungdomspsykiatrien. Veksten i årsverka i barne- og ungdomspsykiatrien har vore på heile 61,5 prosent i perioden, medan veksten for vaksenpsykiatri har vore på 9,7 prosent. I 1990 var 10,3 prosent av alle årsverka innanfor spesialisthelsetenesta psykiatri knytt til barne- og ungdomspsykiatri. Ti år seinare, utgjorde årsverka innanfor barne- og ungdomspsykiatrien 14,5 prosent av dei totale årsverka.

Høgare fagkompetanse

Det har i perioden òg vorte høgre fagkompetanse blant dei tilsette. I 1990 var 5,1 prosent av dei registrerte årsverka i psykiatrien legeårsverk, og ved utgangen av 2000 hadde andelen legeårsverk auka til 6,8 prosent. Det var tilsett psykologar svarande til 4,2 prosent av dei totale årsverka i 1990, og dette hadde auka til 7,0 prosent i 2000. Andelen sjukepleiarar og anna pleie- og terapipersonell med høgskuleutdanning (vernepleiarar, fysioterapeutar, ergoterapeutar, sosionomar, barnevernspedagogar og andre pedagogar) har auka frå 32,1 prosent i 1990 til 42,3 prosent i 2000. Samstundes har andelen personell utan høgskuleutdanning i pasientretta arbeid (hjelpepleiarar, anna pleiepersonell utan høgskuleutdanning, aktivitørar og anna arbeidsterapipersonell) gått ned frå 34,1 prosent i 1990 til 25,9 prosent i 2000.

Utgiftsvekst

Førebelse rekneskapstal syner at barne- og ungdomspsykiatrien hadde ein brutto utgiftsvekst på 9,4 prosent frå 1999 til 2000, medan vaksenpsykiatrien hadde ein tilsvarande vekst på 6,7 prosent. I perioden 1990-2000 auka utgiftene til psykiatriske institusjonar med vel 6 prosent i snitt per år. Den gjennomsnittlege auken per år har vore større for barne- og ungdomspsykiatri (nesten 9 prosent) enn for vaksenpsykiatrien (om lag 6 prosent).

Fleire polikliniske konsultasjonar

I dei psykiatriske institusjonane innanfor spesialisthelsetenesta blei det gjennomført i overkant av 69 500 polikliniske konsultasjonar som ga rett til poliklinisk refusjon i 2000. Dette svarar til 154 polikliniske konsultasjonar per 1 000. I 1999 var det tilsvarande talet 150 konsultasjonar per 1 000 innbyggjarar.

Døgnplassar: Konstant dekningsgrad

Ved utgangen av 2000 var det om lag 6 070 døgnplassar i psykiatriske institusjonar. Av desse var 310 eller 5,1 prosent av plassane i institusjonar for barn og ungdom. Dei resterande 5 760 plassane var i vaksenpsykiatriske institusjonar. Til samanlikning var det 8 010 døgnplassar i 1990, og 3,3 prosent av desse var lagde til barne- og ungdomspsykiatriske institusjonar og avdelingar. Ser ein døgnplassane i samanheng med folkemengda, er dekningsgraden den same i 2000 som i 1999. Det var 1,7 døgnplassar i vaksenpsykiatriske institusjonar og avdelingar per 1 000 innbyggjarar 18 år og over og 0,3 døgnplassar i barne- og ungdomspsykiatriske institusjonar per 1 000 innbyggjarar i alderen 0 til 17 år. Oslo har, som tidlegare år, flest plassar sett i høve til folkemengda, både når det gjeld vaksenpsykiatri og barne- og ungdomspsykiatri, med høvesvis 2,6 og 0,6 døgnplassar per 1 000 innbyggjarar i aktuell alder.

Talet på opphaldsdøgn auka med 0,7 prosent frå 1999 til 2000, medan talet på avslutta døgnopphald (utskrivingar av døgnpasientar) auka med 7,4 prosent i perioden. Frå 1990 til 2000 har det gjennomsnittlege talet på opphaldsdøgn per utskriving vorte meir enn halvert. I 1990 var det i snitt 119 døgn per utskriving, medan i 2000 hadde dette gått ned til 58 døgn i snitt.

Tabeller:

• Tabell 1 Døgnplassar ved psykiatriske institusjonar og avdelingar. Tilknytningsfylke. 2000
• Tabell 2 årsverk ved psykiatriske institusjonar og avdelingar. Tilknytningsfylke. 2000
• Tabell 3 årsverk i psykiatriske institusjonar, etter personellgruppe og type institusjon. 2000
• Tabell 4 Polikliniske konsultasjonar ved psykiatriske institusjonar og avdelingar. Tilknytningsfylke. 2000
• Tabell 5 Opphaldsdøgn ved psykiatriske institusjonar og avdelingar. Tilknytningsfylke. 2000
• Tabell 6 Utskrivingar av døgnpasientar frå psykiatriske institusjonar og avdelingar. Tilknytningsfylke. 2000
• Tabell 7 Døgnplassar ved psykiatriske institusjonar og avdelingar. Tilknytningsfylke. 1999
• Tabell 8 årsverk ved psykiatriske institusjonar og avdelingar. Tilknytningsfylke. 1999
• Tabell 9 årsverk i psykiatriske institusjonar, etter personellgruppe og type institusjon. 1999
• Tabell 10 Polikliniske konsultasjonar ved psykiatriske institusjonar og avdelingar. Tilknytningsfylke. 1999
• Tabell 11 Opphaldsdøgn ved psykiatriske institusjonar og avdelingar. Tilknytningsfylke. 1999
• Tabell 12 Utskrivingar av døgnpasientar frå psykiatriske institusjonar og avdelingar. Tilknytningsfylke. 1999