Fag- og forskingsbibliotek, 2011

Størst auke i talet på bøker og periodika blant fag- og forskingsbiblioteka hadde andre private spesialbibliotek, Universitetsbiblioteka og Nasjonalbiblioteket med ein auke på høvesvis 4 prosent, 3 prosent og 2 prosent frå året før. Dei andre bibliotektypane hadde ein nedgang i talet på bøker og periodika. Nedgangen var størst blant biblioteka ved helseinstitusjonane og biblioteka ved høgskolane, med ein nedgang på 6 prosent frå året før. Universitetsbiblioteka hadde klart størst bestand av bøker og periodika, med 48 prosent av den totale bestanden.

Like mange utlån som året før

Fag- og forskingsbiblioteka hadde nær 4,7 millionar utlån i 2011. Det er om lag det same som året før. Sidan 2006 har utlåna auka med nesten ein halv million, tilsvarande 11 prosent. Andre offentlege spesialbibliotek hadde størst auke med 9 prosent frå 2010 til 2011, medan andre private spesialbibliotek hadde størst nedgang i talet på lån, med 17 prosent nedgang frå 2010 til 2011.

64 prosent bibliotekfaglege årsverk

I 2011 blei det utført 1 600 årsverk fordelt på 1 900 tilsette ved dei 314 bibliotekeiningane som statistikken omfattar. 64 prosent av årsverka var i bibliotekfaglege stillingar. Dette er 2 prosentpoeng lågare enn i 2010, og 8 prosentpoeng lågare enn i 2006. Størst del bibliotekfaglege stillingar finn ein i biblioteka ved helseinstitusjonane, som hadde 93 prosent av dei tilsette i bibliotekfaglege stillingar.

Dei samla utgiftene for fag- og forskingsbiblioteka var i 2011 1,6 milliardar kroner. Ein fjerdedel av utgiftene gjekk til innkjøp av materiale til samlingane, det er den same delen som i 2010. Ikkje alle biblioteka fører kostnader til løn i rekneskapane sine, i nokre tilfelle blir løn dekt av eigarinstitusjonen.

Tabeller:

• Tabell 1 Fag- og forskingsbibliotek. Hovudtabell. 2011
• Tabell 2 Fag- og forskingsbibliotek. Bøker, periodika, utlån, innlån, utgifter, tilsette og årsverk. 2011