Varekonsumindeksen, januar 2003

Den ujusterte varekonsumindeksen var 3,1 prosent høgare i volum i januar enn han var i same månad året før.

Statistisk sentralbyrå frigjer no volumindeksar for delkomponentane mat, drikkevarer og tobakk, elektrisitet og brensel, kjøp av egne transportmidlar og bensin og olje og andre varer.

Sesongjustert gjekk forbruket av elektrisitet og brensel og kjøp av eige transportmidlar, samt bensin og olje ned 2,5 prosent frå desember til januar. I same periode auka konsumet av mat, drikkevarer og tobakk med 1,7 prosent, medan konsumet av andre varer steig med 1,1 prosent.

Varekonsumindeksen, som har som siktemål å talfesta hushaldas vareforbruk, er no framskunda med om lag to veker og publiserast samstundes med detaljomsetningsindeksen , som er ein omsetningsindeks for detaljhandelsnæringa. Fordi Statistisk sentralbyrå no bereknar varekonsumindeksen tidlegare, er ikkje all informasjon vi normalt nyttar tilgjengeleg. I slike høve nyttast førebelse tal som vert erstatta ved neste publisering. Dette gjeld mellom anna elektrisitetskonsumet, der Noregs vassdrags- og energidirektorat sin korttidsstatistikk er nytta. Dette gjer at det normalt vil vere revisjonar i indeksen for førre periode.

Anna utrekning enn i detaljomsetningsindeksen

Samanlikna med detaljomsetningsindeksen har varekonsumindeksen eit anna innhald. For varer som vert selde i detaljhandelsnæringa, nyttar ein detaljomsetningsindeksen som grunnlag, men med ei samanvekting som samsvarer med den delen av omsetninga i næringane som går til forbruk. Dette fører med seg ulik utvikling i dei to indeksane. I tillegg er varekonsumindeksen rekna ut frå omsetning i fleire næringar - mellom anna nyttar ein tal for førstegongsregistrerte bilar, sal av bensin til bensinstasjonar og ikkje-temperaturkorrigerte tal for forbruk av elektrisitet.

Varekonsumindeksen nyttar dei same definisjonane og om lag dei same metodane som i den kvartalsvise nasjonalrekneskapen, og er difor ein indikator for posten varekonsum i kvartalsvis nasjonalrekneskap. Sesongjustering gjerast for dei einskilde delindeksane.