Varekonsumindeksen, juli 2005

Sesongjustert gjekk forbruket av mat, drikkevarer og tobakk opp med 0,7 prosent frå juni til juli, medan kjøpet av bilar, bensin og olje gjekk ned med 0,3 prosent. I same periode viste forbruket av elektrisitet og brensel ein nedgang på 6,8 prosent. Forbruket av andre varer viste ein oppgang på 1,2 prosent frå juni til juli.

Den ujusterte varekonsumindeksen var 2,9 prosent høgare i volum i juli enn han var i same månad året før. Kjøpet av bilar, bensin og olje gjekk opp med 0,3 prosent. Det same gjorde også forbruket av mat, drikkevarer og tobakk, medan veksten i konsumet av elektrisitet og brensel gjekk ned 1,1 prosent. Forbruket av andre varer gjekk opp med 6,1 prosent.

Anna utrekning enn i detaljomsetningsindeksen

Varekonsumindeksen, som har som mål å talfeste hushalda sitt vareforbruk, vert publisert samstundes med detaljomsetningsindeksen , som er ein omsetningsindeks for detaljhandelsnæringa. Samanlikna med detaljomsetningsindeksen har varekonsumindeksen eit anna innhald. For varer som vert kjøpte i detaljhandelsnæringa nyttar ein detaljomsetningsindeksen som indikator. I tillegg er varekonsumindeksen rekna ut frå meir enn omsetning - mellom anna nyttar ein tal for førstegongsregistrerte bilar, sal av bensin til bensinstasjonar og ikkje-temperaturkorrigerte tal for forbruk av elektrisitet. Dette kan føre med seg noko ulik utvikling i dei to indeksane.

Varekonsumindeksen nyttar dei same definisjonane og metodane som kvartalsvis nasjonalrekneskap, og er difor ein indikator for varekonsum i kvartalsvis nasjonalrekneskap. Fordi Statistisk sentralbyrå prioriterer høg aktualitet, må vi i nokre høve nytte førebelse tal, som kan verte endra ved neste publisering. Dette gjeld mellom anna elektrisitetskonsumet, der Noregs vassdrags- og energidirektorat sin korttidsstatistikk er nytta. Denne vil seinare verte bytta ut med Statistisk sentralbyrå sin elektrisitetsstatistikk. Dette gjer at det normalt vil vere revisjonar i indeksen for førre periode.