Aktivitet i sentrumssoner, 1. januar 2016

Tettleiken av både busette og tilsette i sentrum aukar med storleiken på tettstaden. I dei større tettstadene er det fleire gonger så mange tilsette og busette per kvadratkilometer sentrumssone som i bygdesentra. Det er fleire tilsette enn busette per kvadratkilometer i sentrumssonene for alle storleiksklassar. 

Meir enn dobbelt så mange tilsette som busette i sentrum 

I tettstader med fleire enn 20 000 innbyggjarar er den gjennomsnittlege tettleiken av tilsette og busette høvesvis 20 000 og 8 500 per kvadratkilometer sentrumssone. I tettstader med 200-1 999 innbyggjarar er desse tala reduserte til om lag 7 000 tilsette og 1 000 busette. 

Det er no berekna å vere godt over dobbelt så mange tilsette som busette i sentra på landsbasis. Det bur nær 6 500 innbyggarar per kvadratkilometer i sentra, medan tilsvarande tal for tilsette er i underkant av 17 000. 

Det er eit politisk ønskje å nytte tettstadsarealet så godt som råd for å minske presset på areala omkring og samstundes leggje til rette for å minimere transportmengda mellom bustad, arbeid og eit variert tenestetilbod. 

Det er ikkje gjeve at gruppene av tettstader inneheld dei same tettstadene frå år til år. Etter kvart som tettstadene veks, kjem dei over i andre grupper.

Brot i tidsserien

Det er gjennomført ein forbetring av datagrunnlaget til analysen som avgrensar sentrumssoner. Dette gjer at fleire tilsette vert rekna med i statistikken (sjå eigen informasjon om endringa i metode). Dimed er det eit brot i statistikken. 

Omsetnad i sentrum og tettstad – ein viktig miljøindikator

Det er også i år laga tal for miljøindikatorane «Detaljvareomsetnaden i hovudsentra» og «Delen av kommunenes detaljvareomsetnad som går føre seg i tettstad». Dersom meir varehandel skjer i sentrale og konsentrert busette område, og ikkje i spreitt utbygde strok og hjå kjøpesenter utanfor busette strok, vil det kunne føre til mindre transport og utslepp. Statistikken er utarbeidd for dei kommunane der datagrunnlaget er godt nok.